Parlamenterê HDPyî Feleknas Uca, Aycan Îrmeze û Namzedê Serekkomarîye yê HDPyî Selahattîn Demîrtaşî derheqê 24ê Hezîrane de qisey kerdî. Demîrtaşî qala bawerîya serkewtişî kerd û wina va: “Wa herkes seba qezençkerdişî keye bi keye, dewe bi dewe bixebetîyo. Ma do zorê faşîzmî bîşêrî û weçîniteyê îqtîdarî yê altenatîfî awan bikerî.” Xebatê ke seba weçînayîşê 24ê Hezîrane yenî kerdiş, dewam kenî. Partîyî namezedê xo yê weçînayîşî dîyar kerdî û heta nika 2 îttîfaqî ameyî awankerdiş. Partîya Demokratîke ya Şaran (HDP) teberê nê îttîfaqan de ameye verdayîş. Babete ser o Parlamenterê HDPYî Feleknas Uca, Aycan Îrmeze û Namzedê Serekkomarîye yê HDPyî Selahattîn Demîrtaşî qisey kerdî. Parlamenteran ra Feleknas Ucaye va ‘badê ke Demîrtaş bi namzedê serekkomarîye, donemêko newe dest pêkerd’ û wina domnaye: “24ê Hezîrane do seba azadî û demokrasî bibo destpêkêko newe. Ma do 24ê Hezîrane de pêro pîya cuyêka ke ti kes cîya nîno dîyayîş, vêşan nîyo û nîno pelçiqnayîş awan bikerî.” Ucaye dewamê qiseykerdişê xo de wina va: “Heme namzedî bi hawayo asan kampanyaya xo kenî, labelê Demîrtaş zîndan de yo. Cok ra ganî herkes vera na bêedaletîye de destek bido Demîrtaşî. Tewqîfbîyayîşê Demîrtaşî qerarêko sîyasî yo. Wazenî bi tepiştişê Demîrtaşî HDP û weçînitoxan bitersnî, labelê ma nêtersenî. No weçînayîş seba vindarnayîşê faşîzmî firsendêk o. Ma do bi şewe û roje bixebetyî û qezenç bikerî.” Bedenê ma esîr bibo zî fikrê ma azade yî Îrmeze va ‘tarîxê Tirkîya de reya sifteyîne ya ke keso tewqîfbîyaye beno namzedê serekkomarîye’ û wina dewam kerde: “Şexsê Demîrtaşî de heme muxalîfî esîr yenî girewtiş. Na esîrîye zî nîşan dana ke AKP welatî ver bi kura beno. 7 serreyî ra heta 70 serreyî yê ke sey înan nêfikirîyenî, heme erzîyenî zîndan. Labelê wa bizanî ke ê herçiqas ke bi hawayo beden esîr bigîrî zî fikirê ma azade yî. Partîya ke bişînba vernîya AKPyî bigîro, HDP ya. Eke HDP partîya sîstemî bibîyêne, ewro hende raştê tewqîfbîyayîş, tepiştiş û sewbîna nêameyêne. Ma do teber de bibî vengê Demîrtaşî. Belê, şert û şurtî do zehmetin bibî, labelê do îradeya şarî qezenç bikero.” Ma do zorê faşîzmî bîşêrî Heto bîn ra Namzedê Serekkomarîye Selahattîn Demîrtaşî cewab da persanê rojnameyê Bîrgunî ra Huseyîn Şîmşekî û wina va: “Ez bawer kena ke ez do bimana tûra dîyine. Ganî namzedê bînî fikrê xo zelal bikerî ke eke ez bimana tûra dîyine, ê do se bikerî. Heta ke no het de zelalî nêbo, wa ti kes hesabê tûra dîyine nêkero. Ewro potansîyelê ma yê girewtişê se ra 20î yê reyan esto. Ez nêşêna vaja ke no potansîyel açarîyayo rayan. Nika HDP dormeyê barajî de aseno.” Demîrtaşî dewamê qiseykerdişê xo de wina va: “Wa ti kes destûr nêdo vatişê cîyakar û dişmenîye. Ganî herkes seba wezîfedarîya sindoqan muracat bikero. Weçînitoxê teberê welatî wa tesilî şêrî sindoqan ser û rayanê xo bidî. Wa seba qezençkerdişê weçînayîşê 24ê Hezîrane keye bi keye, dewe bi dewe bixebetyî. Wa herkes bawer bikero ke na rey do bibo. Ma do zorê faşîzmî bîşêrî û weçîniteyê îqtîdarî yê altenatîfî awan bikerî.” MERKEZÊ XEBERAN