Başûrê Kurdîstanî de vera endamanê îstîxbaratê dewleta Tirkî de çalakîyêke ameybî viraştene û netîceyê çalakîye de 3 kesî merdbî. Hedîse ra dima Kampa Mexmûrî ser o ambargo ameye ronayene û 73 rojî yo ke ambargo dewam kena.
Nêweş, wendekar, karker û sewbîna ke ganî şêrê Hewlêr, yenê astengkerdene. Dermanî nêweşxaneyan de kêmî bîyî û bi seyan karkerî zî seba ke nêşîyî kar, bêkar mendî. Seba wedaritişê na ambargoye Dayîkê Aştîye yê Kampa Mexmûrî binê şert û mercanê zehmetan de 28 rojî yo ke nuqtaya asayîşî ya PDKyî de çalakîya roniştişî de yî.
Dayîkê Aştîye yê Mexmûrî şewe û roja xo ewja de derbas kenê. Asayîşê PDKyî rayîr nêdano ke werdiş û şimitiş zî seba dayîkan bêro û ekîba weşîye zî zîyaretê dadîyan bikê. Hewteyo vîyarte dayîkê ke nêweş bîy û ameye berdene bi nêweşxaneyî. Nika zî dayîkê ke ewja de yê, hewcedarîya înan bi doktoran esta, la asayîş destûr nêdano ke kes şêro zîyaretê înan.
Xoverdayîşê ma do bidomîyo
Heto bîn de bi çalakîya rayraşîyayîşî ambargo ame protestokerdene. Bi hezaran kesî bi slogananê ‘Wa Biciwîyo Rayber Apo’ û ‘Xoverdayîş cuyayîş o’ ver bi qezaya Mexmûrî ya Mûsilî ra şîyê. Rayraşîyayîşî ra dima îdarekaranê Meclîsê Şarî yê Demokratîkî yê Mexmûrî, selahîyetdaranê Îraqî reyde derheqê ambargo de pêvînayîşêk kerd. Hemserekê Meclîsê Şarî yê Demokratî yê Mexmûrî va ‘Ma sernameyê şarê Mexmûrî selahîyetdaranê Îraqî reyde pêvînayîşêk kerd’ û wina dewam kerd: “Selahîyetdaran va ‘ma wazenê hetkarîya şima bikerê la seba ke mesele sîyasî yo nêeşkenê çîyêk bikê’. Heta ke ambargo nêro wedaritene ma do çalakîya xo bidonî.”
MEXMÛR