Erj û pîrozîyê Kurdan raştê hêrişanê dewleta Tirkî yenî. Heta nika xeylê cayan de goristanî raştê hêrişê dewleta Tirkî ameyî û zaf cayan de esteyê ke aydê goristanan î zî hetê dewlete ra ameyî remnayene. Nê hêrişan ra yew zî Amed de bi.
Gerîlayê HPGyî Mahmût Alinbayo (Adnan Pîro) ke 23ê Hezîrane de Dêrsîm de şehîd bi û qezaya Pîranî ya Amedî de ame definkerdene, mezelê ci raya hîrêyine ya ke raştê hêrişî yeno.
Keyeyê Alinbayî dimayê her hêrişî kerraya mezelî newe keno. Hêrişkaran na reye serê mezelî de nîşanê reykî xêz kerd. Goreyê şahidan rojanê peyênan de wesayîtê zirxînî yê polîsan kewtî goristanî mîyan. Keyeyê Alinbayî mezelê lajê xo newe ra ard pêser û da zanayene ke ê do derheqê hêrişkaran de gerreyê sucî bikerê.
AMED