YAŞAR AKSU / ANF / MÊRDÎN
Mîyanê Tevgerê Azadîye de xeylê qehremanî ke têkoşîn dayî û dima ra resayî şehadet estî. Hîkayeyê zafaneyê nê qehremanan nêameyî nuştiş. Nê hîkayeyan ra yewe zî yê 3 waye û birayanê yewbînan a. Çekdar Cudî, Nupelda Mêrdîne û Mahsûm waye û birayê yewbînan î û heme hîrêyî zî seba Kurdistan û şarê kurdî xover dayî û no rayîr de resayî şehadet.Mêrdimê 3 waye û birayan derheqê cuye, xoverdayîş û nizdîbîyayîşê înan de qisey kerdî û malumat dayî. Çekdar Cudî (Halît Ozen) serra 1982î de qezaya Stewrê ya Mêrdînî ra girêdaye dewa Dengiza de yeno dinya. Çekdar keyeyêko welatperwer de pîl beno. Çekdar beno şahidê vengkerdiş û bi zorî kerdişê dewlete yê qoricîtî. Çekdar vera zext û tedayê ke keyeyê ci ser de ameyî kerdiş de qet bêveng nêmendo û sond werdo ke do vera nêyî de têkoşîn bido.
Dewe ra ver bi Îzmîr
Keyeyê Çekdarî dima ra mecbûr maneno ke koçê Îzmîrî keno. Endamê keyeyî xerîbîye de xeylê zehmetîyan ancenî, labelê netîce de xo muhtacê ti kesî nêkenî û bi no hawa cuyenî. Çekdar ge-ge keyeyê xo reyde waştişê xo yê beşdarbîyayîşê têkoşînî pare keno û dima ra serra 2000î de vera xo dano PKK û beşdarê gerîla beno. Çekdar tim wazeno têkoşînê xo Botan de bidomno. Çekdar tebîet ser o zaf hessas o û no hetê embazanê ci ra yeno zanayîş. Çekdar ferxikêka xezalêkî hetê xo de qayte keno. Çekdar 10ê teşrîna verêna 2004î de reseno şehadet.
Ci ra dima Nupelda
4 serrî şehadetê Çekdarî ra dima na rey waya Çekdarî Nupelda Mêrdîne (Şukran Ozene) sond wena ke do sîlehê Çekdarî erd de nêmano û beşdarê gerîla bena. Nupelda zî sey Çekdarî verê ke beşdarê gerîla biba, embazanê xo reyde nê waştişê xo pare kena. Nupelda zî sey birayê xo hem jîhatî û biaqil a, hem zî tayê hêrsin a. Nupelda mîyanê embazanê xo de bi rindîya xo zî tim aver de ya. Nupelda demêko derg Heftanîn de manena û dima ra beşdarê Xoverdayîşê Rojawanî bena. Nupelda badê ke 6 aşmî vera çeteyan de şer kena, 10ê gulana 2017î de resena şehadet.
Tewr peynî Mahsûm
Şehadetê her di waye û birayan ra dima birayo 3. Mahsûm Ozen zî beşdarê gerîla beno. Mahsûm her çiqas ke hîna ciwan o, reyna zî seba debara keyeyî xebetîyeno. Labelê zerrîya ci tim waye û birayê ci de ya. Doza waye û birayê xo tim dozêka heqdare vîneno û têkoşînê înan qet xo vîra nêkeno. Mahsûm dest bi xebatanê partî keno. Hetê embaz û dormeyê xo ra zaf yeno heskerdiş. Mahsûm seba ke beşdarê çalakîyan bîyo, nizdîyê 2 serran zîndan de maneno. Wexto ke zîndan ra vejîyeno, beşdarê têkoşînî beno. Mahsûm 28ê kanûna 2014î de Îzmîr de bi vatişê ‘Bicûyî Rayber Apo, bicûyî kurd û Kurdistan’ bedenê xo dano adirî ver û şehîd keweno.Keyeyê Çekdar, Nupelda û Mahsûmî yê ke wayîrê xoverdayîşêko sembol î, bi 3 waye û birayanî reyde îftîxar keno.