Gerîlayanê HPG û YJA Starî çalakwananê rojeyê mergî rê mektûbêk erşawito û mektûbe de wina vato: “Qet ameyo dîyayene ke kesê ke tarîx de serkewtî, vera binkewteyan de sere ronî. Ewro ra tepîya dayîkê ma do seba Kurdîstanî şîn nêtepişî. Çimkî no ma rê sebebê şînî nîyo, sebebê pîrozî ya.”
Çalakîya grevê vêşanîye ke Hemsereka KCD û Parlamentera HDPyî Leyla Guvene 8ê Teşrîna peyêne de seba ke tecrîdê Rayberê Şarê Kurdî Abdullah Ocalanî bêro wedarnayene dabî destpêkerdene, roja 177. de dewam kena.
Çalakîya Nasir Yagizî roja 164. de, ya Îmam Şîş û 14 kesanê Strasbourgî zî roja 138. de ya. Heto bîn ra çalakîya 7 hezar hepsîyan zî dewam kena. Nê hepsîyan ra 15 Hepsîyê ke 4 zîndanan de manenî, 3 rojî verê dest bi rojeyê mergî kerdî. Reyna Parlamenteranê HDPyî ra Dêrsim Dage 3ê Adare de, Tayyîp Temel û Murat Sarisaç zî 8ê Adare de dest bi grevê vêşanîye kerdî.
Gerîlayanê HPG û YJA Starî seba ke destek bidî 15 hepsîyê ke dest bi rojeyê mergî, mektûbêk erşawit. Gerîlayan mektûba xo ser nameyê gerîla Erdal Tolhildanî nuşto û mektûbe de xoverdayîşê hepsîyan ameyo silamkerdene. Mektûbe de ameyo vatene ‘rojeyê mergî ke şima 30ê Adare de dayo destpêkerdene, zerrîya kedkaranê ke 1ê Gulane de rasteyan de xover danî reyde dewam keno’.
Sîstemê Îmrali binkewto
Gerîlayan mektûbe de qala rastîya tarîxî kerdo û wina vato: “Qet ameyo dîyayene ke kesê ke tarîx de serkewtî, vera binkewteyan de sere ronî. Ma qey Mazdek teslîm bibi, yan zî Babek û Hurrem zî eynî hewa. Reyna Şex Bedreddîn û Torlak Kemal zî. Ma gelo Elîşêr Koçgirî, Şêx Seîd, Seyîd Rizayî teslîm bîyî? Mahîr Çayan, Denîz, Huseyîn û Yusufî zî teslîm nêbîbî. Hakî Karer Dîlok de teslîm nêbibi û Mazlûm Dogan 3 niftikan reyde roşanê embazanê xo pîroz kerdbi û vera tarîtîya derbeya 80î de sere nêronabi. Wexto ke Zulkuf Gezen zîndan de xo feda kerd, nîşan da ke o pey beran de zî teslîm nêbeno. Îmrali ke seba teslîmgirewtişî awan bibi, şexsê Rayber Apo ke 20 serrî yo xover dano de rewna binkewto.”
30ê Nîsane roja serkewtişê şima yo
Gerîlayan mektûba xo de vato ‘ti dês çin o ke vera Tîje de bivindero’ û wina dewam kerdo: “Ti hucre çin o ke bişînbo heme merdimîye hepis bikero. Hemrayênê, 30ê Nîsane roja serkewtişê şima yo. Şima xoverdayîşê 14ê Temmuze newe ra ganî kerd. Ez wazena şima bizanî senî ke hemleyêka 15ê Tebaxe ameye viraştene û na hemle xoverdayîşê 14ê Temmuze silam kerdbî, ewro zî do hemleyêka winasî do bibo. Ewro ra tepîya dayîkê ma do seba Kurdîstanî şîn nêtepişî. Çimkî no ma rê sebebê şînî nîyo, sebebê pîrozî ya. Ma silam û rêzanê xo erşawenî.”
Roşinvîr û hunermendî nêşênî biremî
Parlamenter Temelo ke 2012 de 68 rojî grevê vêşanîye de mend, derheqê rojeyê mergî û berpirsîyarîye de qisey kerd û hişyarîyê muhîmî kerdî. Temelî bêvengîya hukmat û raya pêroyî rexne kerd û wina va: “Êdî rojî nê, saetî çalakwanan nizdîyê mergî kenî. Mergan ra ya tewr bi zor, vêşanîye ver merdiş o. Heta ke şima fam nêkerî ke ê hepsîyan çira merg girewto xo çim, şima nêşênî çîyêk çareser bikerî. Ti îqtîdar û muxalefet nêşênî vernîya zehmetîya helîyayîşê bedenêkî de cayê xo de bivinderî. Roşinvîr, hunermend û sîyasetmedarî nêşênî berpirsîyarîye ra biremî.”
AMED