Zîndanan de her roje îşkence, surgun û sewbîna neheqîyî benî. Tewr peynî 15 cinîyî surgunê zîndanêkê bînî bîyî. Dayîka Şermîn Ertunçe ke 4 domanê aye zîndan de yî û her yew zîndanêko cîya de manenî, wina va: “Dewlete nêşêna bi tewqîfkerdiş û qetilkerdişan kurdan biqedêna.”

Demanê peyênan de zîndananê Kurdîstan û Tirkîya de dûştê zext û tedayan vejîyayo dûştêko tewr berz. Hema vaje her roje xeberê zext, teda, îşkence, surgun û sewbîna neheqîyan zîndanan ra yenî. Tewr peynî Zîndanê Bakirkoyî de 15 hepsîyê cinîyî surgunê Zîndanê Bunyanî yê Kayserî bîyî.

Cinîyê ke surgunê zîndanê Bunyanî bîyî, nameyê înan wina yo: Leyla Barane, Sîbel Aslantaşe, Hasret Ere, Hacer Yildize, Merge Polate, Cîhan Turke, Ruken Gunduze, Hulya Anci, Bermal Solake, Ece Gokdage, Gîrîn Kinaye, Hacer Kara, Kadrîye Îlbaşe, Şîlan Okute û Emîne Ozere. Yeno vatene ke do ameyox de surgunê neweyî zî bibî.

Nê surgunan de hem hepsîyî yenî cezakerdene û hem zî keyeyî yenî mexdurkerdene. Heto bîn ra hewl dîyeno hepsî û keyeyê înan yewbînan ra bêrî qerfnayene. Nê surgunan ra yê ke tewr zaf tesîr benî dayîk î. Babete ser o dayîkî qisey kerdî û vera surgunan de reaskîyon nîşan dayî.

Ma nê zulmî qebul nêkenî

Dayîka hepsîyê nêweşî Medîne Keskîne dîyar kerde ke herçiqas ke raporê lajê aye yê ‘nêşêno zîndan de bimano’ estbo, hîna zî zîndan de yo û wina domnaye: “Lajê mi Zîndanê Wanî ra surgunê Zîndanê Panosî bi. Lajê mi nêweş o û ganî bêro tedawîkerdene. Mi her roje lajê xo berdêne nêweşxane. Nika qet tedawî nêvîneno. Seba ke îmkanê ma çin o, ma nêşênî şêrî pêvînayîşî. Wexto ke ma şonî pêvînayîş, sehnayîşo rût ma ser o yeno ferzkerdene. Zîndanan de werd nêdîyeno hepsîyan. Heme çî qedexe yo. Wazenî bi surgunan hepsîyan cuye ra biqerfnî. Ma nê zulmî qebul nêkenî. Ê nêşênî bi qedexe û zextan ma biqedênî. Lajê mi nêşêno şertanê zîndanî de bicuyo.”

Dewlete nêşêna biqedêna

4 domanê Şermîn Ertunçe zî zîndanan de zî û Ertunçe 4 serrî yo ke domananê xo nêdîyo. Ertunçe va ‘ez zehmetîyanê girdan cuyena’ û wina dewam kerde: “Domanêkê mi Stenbol de, o bîn Tekîrdag de, ê hîrêyin Wan û ê çarin zî Amed de yo. Ez şêra pêvînayîşê kamcînî? Dewlete bi tewqîfkerdiş û qetilkerdişî nêşêna kurdan biqedêna. Wextê pêvînayîşan de ma ra vanî ‘terorîst’ û muameleyêko xirab ma ser o kenî. Zîndanan de zext û hêrişî estî. Hewte de reyêk erzenî koguşan ser û heqaretê hepsîyan kenî. Hukmat Tirkîya açarnayo zîndano akerde. Çîyê ke wextê OHALî de nînî kerdene, benî. Bi polîtîkayanê surgunî îşkenceyê keyeyan kenî. Wa nê polîtîkayî biqedyî.”

Bi hawayo keyfî cezayî dîyenî

Mêrde û lajê Zubeyde Aksaçe zî zîndan de yî. Aksaçe wina va: “Bi kerdişanê zîndanî hewl danî kurdan biqedênî. Labelê nê kerdişî do veng ra şêrî. 35 serrî ceza dîyaya lajê mi. Nê cezayî bi hawayo keyfî dîyenî. Seba ke îmkanê ma çin o, ma nêşênî şêrî pêvînayîşî. Laj û mêrdeyê mi eynî koguş de yî, wexto ke ez şona pêvînayîşî, destûr nêdîyenî ê her di têhet de ronîşî. Herçiqas ke laj û mêrdeyê mi amebî tewqîfkerdene zî, polîsan her roje eştêne keyeyê ma ser û heqaretê ma kerdêne. Ê hewl danî bi no qeyde ma biqedênî. Labelê ê çiqas zulm bikerî, do hende têkoşînê ma zî gird bibo.”

 

MERKEZÊ XEBERAN