Badê îlankerdişê rewşa OHALî bi Qerarnameyê Hûkmê Qanûnî (KHK) xeylê şaredarîyê DBPyî rê qayûmî ameyî tayînkerdiş. Hetkarê Walîyê Amedî Bîlal Ozkan 11 êlule de sey qayûm tayînê şaredarîya Sûrî bîbî. Qayûm tayînbîyayîşê xo ra heta ewro xeylê xebatkaran gure ra eşt û heme xebatanê cinîyan da vindarnayîş. Heto bîn de zî 9 aşmî yo ke ti xizmet nêdîyayo şarê Surî û Sûr de rijnayîş dewam keno.
Qezaya Sûrî de bi rojan o ke çop nîno arêdayîş û domanî bi çopan kay kenî. Domanê ke çopan reyde kay kenî, nêweş kewenê. Qapaxê rogaran akerde yî û awa lêşine kewena mîyan. Kesê ke taxe de cuyenî, reaksîyon nawitî arênêdayîşê çop û akerdeverdayîşê qapaxê rogaran û dîyar kerdî ke şaredarî xizmet nêdana înan.
432 awanîyê tarîxî
Qeza de sozê xebatê binerdî ameybî dayîş û xebatê restorasyonî zî xeylê giran benî. Keçî Burcuyo ke nika girewte yo û her cayê ci bîyo nuqtayê polîsan, nîno restorekerdiş. Heta ewro 432 awanîyê tarîxî Amed de ameyî rijnayîş û texrîbkerdiş. Taxê Lalebey û Alîpaşayî de zî rijnayîş dewam keno. Babete ser o hemwelatîyê taxe hêrs û reaksîyonê xo nîşan dayî.
Êdî bes o zilma înan
Hemwelatîyê taxe qiseykerdişê xo de hêrsê xo ardî ziwan û wina vatî: “Taxa ma nîna pakkerdiş. Qapaxê rogaran akerde yî û awe debena keyeyê ma. Çopan ver merdim nêeşkeno hewa bigîro. Êdî bes o zilma înan.
ŞÛJIN/AMED