Nameyê bajarê Êlihî heta serra 1940î nameyê dewêka bi nameyê Îluhî bî. Dîyayîşê petrolê herêma Ramanî ra dima Êlih koç girewt. Problemê Êlihî ra yewe zî Newala Îluhî ya ke 10 taxanê bajarî ra derbaz bena ya. Êlih de problemo ke 50 serrî yo nîno çareserkerdiş, esto. Heme awa lîşine ya bajarî, eşteyê taxe û eşteyê Şîrketê TPAO kewenê newale mîyan. Her çiqas ke newale çend rey ameya pakkerdiş zî çareserîyêka pêroyî nîna kerdiş û dormeyê newale hertim lîşin o.
Newala Êlihî mîyanê taxê tewr kehenan ra derbaz bena. Cigêrayîşan ra ame zanayîş ke newale tesîrêka nêbaş şarê dormeyî ser de kena û bena sebebê nêweşîyanê bronşît, astim û çermî. Dormeyê newale de nizdîyê 5 hezar awanîyî estî û heme zî lîşinî ra tesîr benê. Wexto ke varan zêde bivaro laser virazîyeno û merdimî nêeşkenî bivejîyî teber. 31ê teşrîna verêne ya 2016î de laser virazîyabî û xeylê keyeyê dormeyî mîyanê awe de mendbî. No hedîse de 11 kesî merdbî û bi seyan kesî zî bi mal û milkê zirar dîyî. Hedîse ra dima problemê ekonomî virazîya û xeylê kesî koçî kerdî.
Seba Newala Êlihî xeylê xebat û anketî ameyî viraştiş. Heme xebatî vindetî û heta nika ti netîce nêameyo girewtiş. Taxê ke tewr zêde rewşe ra tesîr benê, taxê Çarşi, Huzur û Îluhe yî. Wextê DBPyî de projeyê pakkerdişê newale dîyabî destpêkerdiş. 11ê êlûla 2016î de tayînkerdişê qayûmî ra dima xebatî vindetî û qayûm heme xebatan asteng kerd.
ÊLIH - DÎHABER