Pêroyina Dinya de nêzdî 850 hezar kesê Vîrûsê Koronayî ra kewtê, seba îcadê derzîya Vîrûsê Koronayî bi seyan doktor û pisporê xebityenê la hetanî nika çareserîyêk nêame dîyîş. Hetanî nika ame tesbîtkerdiş ke 45 hezar kesê no vîrûsî ra cuya xo dayê la esil hûmara kesê ke no vîrûsî ra kewtê dîyar nîya, çimkî zaf kesê semptomê nê vîrûsî nîşan nêdanê û bi weşîye vîyarenê. Seba ke tedbîrê cidî nînê girewtiş, vilabîyayişê Vîrûsê Koronayî Tirkîya de zî lez vila beno.
Rewşa îzoleyî de yê
Çi balo ke hema zî 6 welatê parzamenê Efraqe, Yemen û Koreya Vakûr de Vîrûsê Koronayî nêame tesbîtkerdiş. Nê welatan de tesbîtnêbîyayişê Vîrûsê Koronayî ser o pisporan vanî ke nê welatan seba ke rewşa îzoleyî de yê û seba tesbîtê vîrûsî ekîpmanê înan çîn ê, no ser zî Vîrûsê Koronayî nîno tesbîtkerdiş.
Welatê Efrîqaye Burundî de hetanî nika vîrûs nêame tesbîtkerdiş û no ser zî no welat aşma gulane hadreyîya weçînayişê pêroyine keno. Vervatoxê Hukimata Burundîye vat ke ê Homa ra şikir kenê ke no vîrûs welatê înan de nêame tesbîtkerdiş.
Dermanê tayî şuxilnenê
Welatê Yewîyeya Komorijan de zî hedîseyê Vîrûsê Koronayî nêameyî tesbîtkerdiş, pisporê tay nê welatê babete ser o vanî ke ê seba ke dermanê tayî şuxilnenê no ser zî Vîrûsê Koronayî welatê înan de vila nêbeno. Welatê Efrîqaye Lesotho de zî hetanî nika vîrûs nêame tesbîtkerdiş la no welat 25 rojê welatê xo girewt binê karantînaye. Welatê bîn zî seba ke mîyanê xo de izoleyî no ser zî hûmara raştîn a hedîseyê Vîrûsê Koronayî nîno tesbîtkerdiş. MERKEZÊ XEBERAN