Vizêr saetanê serê sibayî de polîsan 8 bajaran de eştî keyeyê xeylê rojnameger û sîyasetmedaran ser û nizdîyê se kesî tepiştî. Netîceyê sereştişan de xeylê kesê ke mîyanê înan de rojnamegerî Abdurrahman Gok, Kîbrîye Evrene, Esra Solîn Dale, Semîha Alankuşe û Hemserekê HDPyî yê Amedî Mehmet Şerîf Çamci zî tede nizdîyê se kesî ameyî tepiştene.
Ame musayene ke polîsan bi sîlehanê luledergan eşto keyeyê Gokî ser. Polîsan wextê sereştişî de Gok derb kerdo û dest ser nayo kitab, kovare û ekîpmananê Gokî ser. Sebebê sereştişan nêame musayene. Reyna polîsan eşto ser keyeyê rojnameger Omer Çelîkî ser, labelê Çelîk keye de nêbîyo. Berê keyeyê Çelîkî ameyo şiknayene û keyeyê ci ameyo têmîyan kerdene. Heto bîn ra rojnamegere Semîha Alankuşe zî Stenbol de ameya tepiştene. Vernîya awanîya HDPyî ya Amedî de wesayîtê zirxinî û TOMA vindenî.
Goreyê îzeheto ke hetê Wezîrîya Karê Zereyî ra ameyo dayene, netîceyê sereştişan de 8 bajaran de pêro pîya 90 kesî tepişîyayî. Reyna Wan de zî 6 kesî ameyî tepiştene. Heto bîn ra bajarê Êlihî de 8 kesê ke ameybî tepiştene, înan ra 5ê ameyî tewqîf kerdene û yeno pawitene ke 3 kesê bînî zî neqlê dozgerîye bibî.
MA / AMED