80 sere naye ra ver Sêy Riza teba şeş cangorîyanê bînan Xarpêt de Meydanê Genimî de amê darde kerdene.
Êno zanitene, ke dardekerdişê nê cangorîyan hênî berhemê polîtîkaya rojan ya kî aşman nêbîye. Na polîtîka Împaratorîya Osmanijan ra dest kerd bî ci hetanî rijîyayişê împaratorîye dewam kerd.
Xora demê ver va rijîyayişî şîyena Împaratorîya Osmanijan de, yanê Cengê Cîhanîyê Juyinî de û daye ra ver kî şarê ma derheqê re heqanê xo wayir vejîyene de herê kewt. Roşnavîranê ma ra tayêne xo rê paytextê Împaratorîye kerd bî mesken, têkilîya xo welatî ra birnay bî. Tayêne waştêne çîyê bikerê, lê xo mîyan de jutîya xo nêviraşt bî, ya kî her çiqas waştêne re heqanê xo wayir bivejîyê kî, nakê xo koledaran ra nêbirna bî, hêna hêvîye kerdêne, ke ê şîkînê bi raya haştîye koledaran ra heqanê xo bigêrê.
Serdestanê Împaratorîye, îmkanê ke Cengê Cîhanîyê Juyinî da bî ci, seba polîtîkaya xo ya seran rind xebetnê û bi naye meselaya Armenîyan koke ra ‘hal’ kerde.
Xora qirkerdişê Armenîyan ra dime hem keso ko duştê qirkerdişan de bivindo, sare wedaro nêmend bî, hem kî serdestê Împaratorîye bi nê qirkerdişî bî wayirê îmkanê neweyan, bî wayirê mutefîkê neweyan.
Cengê Cîhanîyê Juyinî ra dime, hêna ke dewleta newîye ava nêbîya, kadroyanê Îtîhadî dest bi qirkerdişê şarê ma kerd.
Koledaran nê qirkerdişî de qet derheq de sîndorî nas nêkerdî. Ne şert û şurtê cengî, ne cuyena sîvîlan, ne kî qeyde û quralê ahlaqî. Koçgîrîye ser û bin kerde.
Rijîyayişê împaratorîye ra dime, bi hetkarîya dewletanê pîlan, avankerdişê cumhurîyetî ra dime, hem zere de, yanê mîyanê sîndoranê dewleta newîye de, hem kî teber de, yanê Ewropa û cayanê bînan de raya qirkerdişanê bînan, neweyan bîye ra. Çîyo ke, keso ke verê dewleta newîye de bibo asteng nêmend bî.
Kes û şarê ke bîyêne hedefê nê qirkerdişî jubînî ra cîya, bê îtîfaqan, bê hetkarîyan tenya mend bî. Kadroyanê dewleta newîye, dewamê Împaratorîya Osmanijan, nê şertan de dest bi qirkerdiş, asîmîlasîyon, koçberkerdişê şarê ma kerd. Dardekerdişê Sêy Rizayî bîyê gilê nê zulimî û destcikerdişê jenosîdê hîrisûheştî. Nê zulimî hetanî pêynîya seranê pancasî kerd û aye ra dime kî hetanî ewro dewam keno.
Hetê dewlete de çîyê nêvurîyo. Her çî zê verî yo. Her çiqas gegane seba polîtîkaya xo ya rojaneye fek vurnena kî, dewlete eynî dewlet a. Armancê xo qedênayena şarê man a.
Dewlete dewleta verî! Ma ma, şarê ma?
Gelo şarê ma duştê nê zulimî de zê şaranê bînan bîyo ju?
Gelo şarê ma zê şaranê bînan duştê nê zulimî de re zonê xo, re kulturê xo, re bawerîya xo wayir vejîno?
Bê guman şarê ma zaf çî kî kerdî, lê eke mordem şaranê bînan de bişano têver, ma zaf tepîya mendîme. Seba naye kî gere ma ju bîme, gere ma re zon û kulturê xo wayir bivejîme. Eke ma sere de Sêy Riza û cangorîyanê bînan anîme xo vîrî, verê înan de bi hurmet bejna xo tewênenîme, gere ma re zon û kulturê înan kî re bawerîya înan kî wayir bivejîme, bişeveknîme, ravêr berîme.
Bi na hêvîye ez rêyêna verê Sêy Rizayî û cangorîyanê bînan de bejna xo tewênena.