Mîranî, destnîşan kir ku yek ji armanca Iranê jî li hemberî vîna Kurdan bibe asteng û wekî rêveberiya Tirkiye û Suriyeyê li hemberî vîn û birêvebirina Kurdan bibe asteng. Mîranî, da zanîn ku Îran bi hevkariya welatên cîran dixwazin destkeftiyên Kurdan ji destê wan bigirin û pêşiya rêyên çareseriya pirsgirêka Kurdan bigirin. Mîranî, bilêv kir ku Îran naxwaze pirsgirêka Kurd çareser bibe û wiha axivî: „Pêwîste Îran reformê pêk bîne. Ji ber ku bingeha çareseriya pirsgirêkê li Qendîlê ye. Pirsgirêk ne li Hewlerê û ne jî li Tehranê çareser dibe. Lazime Îran pirsa ‘ji ber çi PJAK çek rakiriye?’ Dema ku Îran mafê Kurdan bide û pisgirêkan çareser bike dê wê demê kes çekê hilnegire. Ji ber vê yekê lazime Îran baş bifikre.”
Mîranî destnîşan kir ku dema pirsgirêk dibe Kurd û dema dibe tevgera azadiya gelê Kurd ên wekî PKK û PJAK’ê hemû hêzên Rojhilata Navîn ên wekî Tirkiye, Îran, Iraq, Sûriye û yên din dibin yek. Miranî, daxuyand ku hemû hêz li hemberî tevgêrên azadiya Kurd dikevin nava tevkariyekê û bi hevre şekerî dimeşînin. Mîranî, ji gelê Kurd xwest ku li hemberî vê polîtîka û lîstikê hişyar bin û neyên van lîstîkan.

Parlamentera Duhokê yê Parlamentoya Herêma Federal a Kurdistanê Emîne Zîkrî jî anî ziman ku bi van operasyonan dixwazin hem krîza aborî û hem jî krîza siyasî pêş bixin. Zîkrî, da zanîn ku bi vê êrîşê hem peymana navneteweyî ya şer û hem jî peymana neteweyî hatiye binpêkirin. Zîkrî, destnîşan kir ku li gorî xala 110’emîn parastina sînorê Iraqê peyvira Herêma Federal a Kurdistanê ye û ev yek nehatiye parastin. Zîkrî, da zanîn ku berpirsiyariya hemû welatan di vê operasyonê de heye û herî zêde ewlehiya welatiyên herêmê di talûkeyê de ye. Zîkrî, ji Mesût Bersanî û gelê Kurd xwest ku li hemberî vê yekê bertekên xwe zelal bikin.

HEWLÊR/DÎHA