Mektebanê kurdî veng day malimanê kurd yê ke wezîfe ra amey dûrvistiş ke şirê mektebanê xo de bigurweyê.
Amed, Gever û Cizîr de verîya hîrê serran seba perwerdeyê bi ziwandê kurdî mektebê abîyay. Serra xo ya hîrêyîn de mektebê azad hadreyînê serra newî yê perwerde temam kerdî û 26ê îlone de destpa perwerdeyî kenê. Malima Mektebê Seretayî yê Ferzad Kemanger ê Rêzana Amedî Leyla Bagatir da zonayen ke ê seba serra newî yê perwerde hadre yê.Bagatir veng da malimê girêdayê Egîtîm Senî yê ke wezîfe ra dûrvistîyay û bi ziwandê kurdî şenê perwerde bidê serra newî de verê xo bidê mektebanê azad û tîya de dersan bidê wendekaran rê. Bagatir vist vîrî ke verîya hîrê serran Mektebê Ferzad Kemanger ebe zehmetîyanê pîlî ame akerdiş û da zonayen ke par pêropîya 8 polê înan estbî.
Perwerdeya alternatîf
Leyla Bagatir ard ziwan ke heta nika 90 domanan (qeçek) mektebî de ameyê nusnayiş û wina va: “Malbatî wazenê ke domanê înan bi ziwandê xo perwerde bivînê. Xêlê malbatan domanê xo Mektebanê Aydin Erdem û Medenî Yildirim de qeyd kerdê.” Bagatir da zonayen ke iyê dê emserr zî kontenjanê xo pirr bikerê û va: “Ma dê heta peynîya aşma Îlone qeydê domanan qebûl bikerê. Ma perwerdeya xo rê vanê perwerdeya alternatîf. Ma hetkarê perwerdeya bêpere yê. Domanê ke mektebanê ma de wanenê, ma înan keyeyê ci ra gênê û peynî de peyser benê keyeyanê ci.” Bagatir da zonayen ke seba wendekaran hadreyînê mektebê navîn ramnenê û vist vîrî ke rixmê manîkerdişê dewlet Weqfa Mezopotamya zî seba akerdişê zangehî zerreyê hewldayenan de ya.
Zerreyê sîstemî de wendiş bêmane yo
Malima Mektebê Ferzad Kemanger Leyla Bagatir hayr ant malimê Egîtîm Senî yê ke hetê hikûmeta AKP karî ra amey dûrvistiş ser wina veng da înan ke şirê mektebanê kurdî de bigurweyê: “Yeno vînayen ke zerreyê sîstemî de wendiş bêmane yo. Seba nayî zî ganî şar alternatîfanê xo rono û ser payan de vindero. Zerreyê malimê ke karî ra amey dûrvistişî de xêlê mamosteyê ke şenê bi ziwandê kurdî de perwerde bidê zî estê. Ganî nê malimî endî malimîya sîstemî de israr nêkerê û bîrê mektebanê azad de bigurweyê. Ma dê seba înan polan akerê û ê dê him perwerde bidê, him zî mektebê ma dê quwetîn bê.”
Bagatir veng da şarî ke 26ê aşmî de tewrê destpa kerdişê perwerdeyîya serra newî yê mektebanê înan bibê.
DÎHA / AMED