Mabênê Amerîka û dewleta Tirkî de pêvînayîşêk ame kerdene û dima ra dîya zanayene ke seba Vakur û Rojhelatê Sûrîye adirbes ameyo îlankerdene. Babete ser o Endamê Heyetê Caardişî yê TEV-DEMî Aldar Xelîl û dîyar kerd ke no netîceyê xoverdayîşî de vejîyayo werte.
Xelîlî va ‘dewleta Tirkî bi hawayo hovane hêrişê herême kerdêne’ û wina dewam kerd: “No wext çiqas ke derg bîyêne, Erdoganî zî hende îflas kerdêne. Dinya de reaksîyonî gird bîyêne û destekê ke dîyayênê xoverdayîşê ma zî zêde bîyênên. Ê mecbûr mendî ke tepîya game bierzî.”
Xelîlî qala muhîmîya xoverdayîşî kerde û wina va: “Îzehetê adirbirnayîşî netîceyê xoverdayîşê ma de ame dayene. Raştîya xo de hêzanê mîyanneteweyîyan waşt ke şorişê şarî bi komployêkê veng vejî. Labelê wexto ke înan dî ke sernêkewenî, rewşa peyêne kontrol kerde. Ma zî do rewşe ser o bivinderî. Nê babetî tena bi înan nêbena. Wexto ke Jeffreyî ma reyde pêvînayîş kerd, herêma biewle ma ser o ferz kerd. Eke prosesê şerî derg bîyêne, o wext seba înan baş nêbîyêne. Eke şerwananê ma xover nêdayêne û şarê ma tewirê xo nîşan nêdayêne netîceyêko winasî zî nêvejîyayêne werte.”
Wa yewîya xo gird bikerî
Fermandarê Pêroyî yê QSDyî Mazlûm Ebdîyî va ‘no destpêk o’ û wina dewam kerd: “Wa şarê ma bizano ke no adirbirnayîş semedê Girê Spî û Serêkanîyê yo. Nê cayan de bi seyan sivîlî ameyî qetilkerdene. Bi hezaran kesan zî bar kerd. Ma zî adirbirnayîş qebul kerd. Seba ke no adirbirnayîş netîce bîgêro ma sey QSDyî çîyo ke destê ma ra bêro ma do bikerê. Berpirsîyarê nê adirbirnayîşî Amerîka ya. Semedê cayanê bînan pêvînayîşî nêbîyî. Hêzê ma hema cayanê xo de yê. Ez heme şervan û şarê ma û înan ke piştî daye ma tîya ra silam kena. Ganî şarê ma û hêzê ma yê sîyasîyî xoverdayîşê xurt bikerê.”
QAMIŞLO