Dewleta tirkî her dem xorê hemkaran kena pêda û karanê xo yê qilêrinan bi destê nînan dana kerdene. Tornê Osmanî her tim na metod anê kar. Serranê 70 de dewleta terorîste verva şoreşgeran faşîstê MHPyîz ardî kar. Bi destê ulkucuyan bi hezaran şoreşgerî dayî kistene.

Serranê 80 ra dima zî pêro hukumatanê dewleta terorîste, bi taybetiye verva kurdan, ulkucuyê kanî jê Abdullah Çatli ardî kar. Tabî lewê nî faşistan de dewlete rêxistina Hîzbullahî zî verva kurdan gureynê. Azayê Hîzbull-Kontra pêro kurdî bî. Dewleta tirkî bi destê nî qetilkaran hata serranê 2hezarî bi seyan kurdî dayî qetil kerdene. Hîzbull-Kontra lewê dewleta terorîste de ca guret û kewte gonya kurdan. Waxt ame karê qetilkaran qediya. Dewleta tirkî na raye verê xo çarna Hîzbull-Kontra û rayverê na rexistina qetilkare jê Huseyîn Velîoglu kiştî. La, azayê Hîzbull-Kontra onca zî baqil nêbî.
Dima 2002 de AKP bîye serdest. AKP zî xorê Cemaatê Fetullah Gulen jê hemkar çînît we. Cemaatê Fetullahî kurdan rê aya ke nêbiye kerde. Hukumatê Recep Tayyîp Erdogan vengê xo nêvet. Polîsanê Fetullahî ke se kerd, çi xiraviye kurdan rê kerde, Recep Tayyîp Erdogan polîs û eskerî goynayî. Waxt ame polîsê Fetullahî est Erdoganî ser. Nika Erdogan vano “dewleta paralele” esta. Hemkarê Erdogan, Cemaatê Fetullah Gulen, sarê Erdoganî rê biyo bela. Hama hen oseno ke Erdogan zî naye ra derse nêgureta û baqil nêbiyo.
Naye zî ma kerdena HUDA-PAR de vîneme. Recep Tayyîp Erdogan rind zoneno, HUDA-PAR kam a û azayê na partiye leto jede azayê Hîzbull-Kontra yê. Hukumatê AKP verecoy jû qanun vet û azayê Hîzbull-Kontra hepisxanan ra serbest verdayî ra. Par asma cotmehe de zî Erdogan rayverê HUDA-PAR qebul kerdî û tey qesey kerd. Jû hefte na diyayîs ra tepiya azayanê HUDA-PAR Batman de jû genco kurd, Ozcan Temel, qetil kerd. Hen oseno ke Erdogan na raye zî na partiye xorê jê hemkarê çînîta we. Na partiye nika onca Kurdîstan de teror vaydana û hukumatê tirkî ra onca veng nêvejîno.
Hefto peyen roza posemiye garana HUDA-PAR na raye bi çek, wişir û levye Lîce de est sarê ma ser. Tabî quwetê dewlete onca caye nêosayî. Dewletake seweta slogan estene bi serran ceza dana domonanê kurdan û her teşkîlatê BDP bi kamerayan kontrol kena, Lîce de azayê çekdarî yê HUDA-PAR nêdî. Omidê ma oyo ke roze yena, na hemkara Erdogan zî cirê bena bela, seke Cemaatê Fetullahî cirê bî saredez.