13ê Gulana 2014î de qezaya Manîsa Soma de madenê komirî de hezaz virazîyabi û netîceyê hezazî de 301 karkerî merdbî û 162 kesî zî birîndar bîbî. No sey tarîxê Tirkîya de cînayetê karî ke tewr zaf merdimî netîceyê ci de merdî, derbazê qeydan bi. Qetlîyam ra dima ame famkerdene ke madene de xeylê kêmanî estbîyî, ewleyîya karî qet çinêbîya û karkerî bîyî qurbanê hêrsê pereyan yê sermayedaran.
Qetlîyam ra dima Muşavîrê Serekwezîrî Yusuf Yerkelî paşkulî dabî merdimê keso ke maden de merdbî ro. Avûkatanê ke madenwanan pawitêne ra Selçuk Kozagaçli 20ê Adare de 11 serrî 3 aşmî ceza girewt. Netîceyê mehkemekerdişan de sey xelate ceza dîya wayîrê madenî. Wayîrê madenî ra Can Gurkan rê tena 15 serrî ceza dîyaye. Muduro pêroyî û çend kesanê bînan rê mabênê 7 û 22 serran de cezayê hepsî dîyayî. Bi desan kesê ke berpirsîyarîya înan zî qetlîyam de estbî, berat kerdî. Wexto ke doze kirişîyaye Îstînafî, qerarê serbest veradîyayîşê Gurkanî dîya.
Partîya Demokratîke ya Şaran (HDP) zî babete ser o îzehetêk da çapemenîye. Hetkarê Hemserekîya Pêroyî ya HDPyî Alî Urkutî da zanayene ke mesuldarê Qirkerdişê Soma ameyê xelatdarkerdene, AKP çimanê xo hemverê kiştişanê karî de gêno û paştî dano patronan.
AMED