Endamê Konseya Rayberîya KCKe Engîzek dîyar kerd ke hedefê AKPe no yo ke elewîyan kaş bika xetê sûnî yan zî înan qetil bikera û wina verdewam kerd: “Na rewşe seba elewîyan çîyo ke zaf muhîm o û ger ke elewîyî wazenî bi kamî û bawerîya xo bicuyî se lazim o rayvistîya xo û xoverdayîşê xo hîna berzêr bikerî. Ez wazena elewîyê kurd, tirk û ereban ra veng bida. Dewleta tirk wazena elewîyan kaş bika xetê sûnî û seba no zî zaf hewl dana. No demo peynî de taybetî bi destê DAIŞ teda înan kena û bi no hawa wazena înan teslîm bigîra. Ma vînenî ke polîtîkayê îslamo sûnî bi destê AKPe yenî meşnayîş. Wa elewîyî bizanî ke rewşe zaf cîddî ya û no semedî ra ganî goreyê ci xover bidî û xo rayvist bikerî. Ma encax eşkenî bi no hawa qezenc bikerî.”
Wazenî bidî koçkerdiş
Engîzek dergeyîya qalîkerdişê xo de ard ziwan ke ger ke dijî nê polîtîkayan de xoverdayîşêko gird nêro nîşandayîş, elewîyî do hem qadê bawerîya xo û hem zî bîyîşê xo vînî bikerî û wina domna: “Çîyo Terolarê Gurgumî, Sêwaz, Semsûr, Tokat û sewbîna zaf cayan de yeno kerdiş no yo ke bi awankerdişê kampê DAIŞe, elewîyan biqedênî ya zî bidî koçkerdiş. Dijî nînan bi çalakîyanê pasîfî encam nîno girewtiş. No semedî ra çalakî û rayvistbîyayîşê hîna cîddî lazim î. Ger ke wina nêbo ma do heme çîyê xo vînî bikerî. Ma talukeyêke no hawa reyde rî bi rî yî.”
Elewî do xo bipawî
Engîzek vat ke weyra de wesayîtê karî zaf xebityenî û dijî no xebatan şermizarkerdiş zaf tay o û wina peynî kerd: “Ganî ciwan û cenîyê elewîyan hêzê xo yê pawitişî awan bikerî. Îlla lazim nîyo ke ciwanî çek bigîrî destê xo, lazim o vernîya nê wesayîtê karî de bivinderî û no dagirkerdişî bidî vindarnayîş. Na ravêreye de Tevgerê Azadî ya Kurdî her hetî ra xurt bîya û ganî elewîyî zî awayo gird beşdarê xoverdayîşî bibî. Ganî xoverdayîşêko wina bêro nîşandayîş ke dewlete tepa gam bierza. Bi eştişê dirûşmeyan û bi vengdayîşî reyde no dagirkerdiş nîno vindarnayîş. Seba vindarnayîşî ganî xoverdayîş hîna zî girdêr bibo.”
No hedîseyê bexwaştoxan nîyo
Serhat Engîzek qalîkerdişê xo de bal ant ser cayê ke kampî yenî awankerdiş û wina vat: “No hedîse eleqeya xo bi kampê bextwaştoxan çin o. Çimkî sewbîna cayî de nêronenî û anî cayê ke elewîyan de nê kampan awan kenî. Dewleta tirk seba çi nê polîtîkayan meşnena. Ger ke bextwaştoxî bi xo biameynê yew ca de bi ca bibînê, merdim fam kerdênê. Aye çax merdim şînaynê wayîr zî bivejyo. La no kampê bextwaştoxan nîyo, çimkî dewlet bi xo virazena. Qey nêbenî Enqere û Kayserî de ca nêkenî. Hetta deşta Konya zaf hera ya, wa bîşêrî weyra de bi ca bikerî. Seba çi anî cayê ke tewr zaf elewî tede cuyenî de awan kenî. Ganî elewîyî fam bikerî.”
ANF/BEHDÎNAN