Qezaya Şirnex Cizîr de teror û hêrişê dewlet roja 29. de ramenê. Heta nika qeza de 43 welatijî amey kişten.
Cizîr de, hêriş û cînayetê dewleta Tirk ramenê. Tewr peynî de çeteyê AKP yê ke eştî mehleyan ser, 9ê aşmî de, welatijê bi nameyê Nebî Katlav û Şukrî Coşkûn kişt. Vizêr zî welatijê bi nameyê Ahmet Zirig, Alî Bagdûr û Haci Elçî amey qetilkerdin. Qeza de heta nika 43 welatijî amey qetilkerdin.
Cenaze remnay
Polîsan 6 cenazeyê welatijan nêweşxaneyê Şirnex’î ra remnay û bi korsan wazena definbikero. Qeymeqamtiya Cizîr malbatanê 6 cenazeyan geyriya û aşkere kerd ke, î yê dê cenazeyan mezeleyê Asrî de defin bikerê, 1 kes şeno şiro cayê definkerdin. Malbatan na kerden rê nêrazîbiyen damûsnay û vatî: “Na tetorîzma, wehşeta, ma dê ti wext nay qebûl nêkerê.
YPS cewab da hêrişan
Şewa bîn qûwetanê dewlet heta seatanê sodir, bi tanq û kobreyan top û bombeyî eştî mehleya Cûdî ser. Qûwetê YPS zî cewab day sereştişanê çeteyanê dewlet. Netîceyê gulevornayenê tîman hu polîsan de welatijê bi nameyê Şukrî Coşkûn û Nebî Katlav’î weşiya xo kerdî vinî. Netîceyê cewabdayişê YPS de esker û polîsî peyser anciyay gir-tepeyan ser.
Verra Cizîr û Sîlopî sewqiyetê eskerî yê dewlet zî ramenê. Roja verî bi desan wesayîtê zirxî, esker û tîmê teybet kirêşiyay hurdî qezayan.
Sêrt ra hetê Şirnex paştdayen
Rêxistinê HDP û KJA yê Sêrt ewro bi sloganê “Şirnex de merdimatî mirena” Sêrt ra hetê Şirnex nûmayiş virazenê. Parlamenterê HDP yê Sêrt Besîme Konca û Kadrî Yildirim vengê wayirvetişê doman û ceniyan, rûmet û biyayişê day. Yildirim’î va, roja roja keyifkerdiş niya, roja xoverdayiş a. Serkewtiş do yê ma bo.
Xoverdayişê Sûr roja 41. de yo
Qezaya Amer Sûr de zî ablûqa û hêrişê dewlet roja 41. de ramenê. Ser cewabdayişê qûwetanê pawiten xeylê tîmê teybet û eskerî amey kişten.
Hêriş û bombevaranê qûwetanê dewlet çormeyê mehleyanhe Dabanoglu, Hasirli û çormeyê Mardînkapi û Camîya Kûrşûnlû de vizêr dewam kerdî. Camiya Kûrşûnlû ra dûmanê siya bî berz. Cenazeyê Îsa Oran û Mesût Sevîktek’î yê ke hetê tîmanê teybet, mektebê Yavûz Selîm’î de amey qetilkerdin hona mehleya Dabanoglu de yê. Qeza ra dûmanê siya berz bî. Goreyê zonayişan xeylê polîsê herekatê teybet û cendirme amey kişten. Bi desan ambûlansî sewqê herem bî.
Wan de înfaz
Qezaya Wan Artemêtan de çeteyanê AKP 12 gencî înfaz kerdî.
Tîmanê teybet vizêr seatanê sodir de, eştî jew keyeyo ke taxa Yenîmahalle yê Artemêtan ser. Çeteyanê AKP bi seyan guleyan keye day ver guleyan û 12 gencî qetilkerd. Şahidê biyayiş N.E da zonayene ke, sifte teqînayoxî eştî zereyê keye. Goreyê N.E polîsan gencê ke keye ra vejiyay day ver guleyan, bado ke qetilkerd, cenazeyê gencan eştî parqî. Gencan ra 11ê ci mavêna 17-19 serreyê. Goreyê vatenanê weşî, 3 cenaze, yê veriya çend rojan ê. Parlamenterê HDP yê Wan Lezgîn Botan’î zî îdiayê gurekaranê weşî raşt kerd. Botan’î vist vîrî ke 12 gencî pêrokîn serreyê ci ra, bi jew gule ameyê înfazkerdin.
Kamiyê 9 gencan wina yo:
Fuat Akdemîr, Ekrem Mete, Fazil Kûş, M.Sidik Orhan, Naîm Tekîn, Umît Urgen, Denîz Aşkan, Ahmet Ozer û Şaban Gunay. Cenazeyê gencan bi behaneyê ‘tîvarî’ rişiyenê Sazgeha tiba edlî yê Meletî. Rêxistinê DBP û HDP parqa feqiyê teyran de are bî û înfazî rê nêrazîbiyen damûsnay.
DÎHA/WAN