20ê Temmuza 2015î de qezaya Pirsusî ya Riha de netîceyê teqayîşêkî de 33 ciwanî ameybî qetil kerdene û emser serrgêra 3. ya qetilbîyayîşê ciwanan o. Babete ser o Konfederasyonê Macîranê Bindestan yê Ewropa (AvEG-Kon) îzehetêk da.
Têkoşîn dewam keno
Îzehet de ca dîya qewimîyayîşê hedîseyî û wina ameyo vatene: “Ciwanî goş dayî vengdayîşê Rojawanî û waştî ke destek bidî ewja. Ciwanan seba ke ewja de kitabxane, parka domanan, ronayîşê daran û sewbîna bikerî, kewtbî rayîr, labelê ameyî qetil kerdene.”
Konfederasyonî dewamê îzehetê xo de wina vato: “Dîktatorîya AKP û Erdoganî ke xeyalê binvistişê Kobanê kerdênê, waştî heyfê xo ciwanan ra bigîrî. Qetlîyamê Pirsusî şerê îmhakerdişî de gama sifteyîne bi. Dîktatorîye binkewtişê 7ê Hezîrane hezim nêkerde û konseptê şerî daye dest pêkerdene. Xeylê cayan de qetlîyamî ameyî viraştene û cêrzemînan de bi seyan merdimî ameyî qetil kerdene. Ewro têkoşînê huqûqî yê merdimanê ciwanan dewam keno. Ma do bibî taqîbkarê doza Pirsusî. Nika ra pey prosesê têkoşînî dest pêkerdo. Seba perskerdişê hesabê Pirsusî, vejîyayîşê ziqaqan hîna muhîm û manayin o.”
ANF/BRUKSEL