Reîscûmhûrê Tirkiye Recep Tayyîp Erdogan’î ke bi vatişanê “şima YPG/PYD rê paşt danê, la El-Nusra rê vanê terorîst” vera koalîsyonê mavên neteweyî hêrsê xo damusna, kurdanê Rojawa hedef girot. Vera nê vatişanê Erdogan’î, jû nêrazîbiyen zî rêxistinanê alewî yê Semsûr ra amê.
DAIŞ û Nusra qetlîaman virazenê
Serokê Şûbeyê Komeleya Kultur yê Pîr Sûltan Abdal’î Mahmût Yapici vist vîrî ke, El-Nusra jû koma çete ya ke DAIŞ ra abirniya ya. Yapici da zonayen ke hurdî zî zey pê yê û qetlîaman virazenê, piya gurweyenê, rêxistinê terorî yê û qiseyê xo wina domnay: “El-Nusra û PYD zey pê biname kerdiş raşt niyo. Şaştiyê PYD vera Tirkiye, ya zî welatekê bîn nêbi”. Mahmût Yapici vist vîrî ke, veriya nika El-Nusra Semsûr de dewanê alewiyan de geyriyay, gureyinê tespîtkerdiş ramenay. Yapici va, ma vatişanê Reîscûmhûrî qebûl nêkenê. Hurdî rêxistinî zî serva ma talokeyê.
Birabiyîna wina nêbena
Mahmût Yapici aşkere kerd ke, qetlîamê ke AKP Sûr, cizîr û cayanê bîn yê Kurdistan de ramena, ma zey alewî qebûl nêkenê û wina va: “Ma nîwazenê cenî, qeçek, kes bimiro. Wa esker û polîsî zî nêmirê. Ewja de şar xover dano, cenî û qeçekî xover danê. Ti dê him kurdan ra vajê birayê mi, him zî ti dê qetil bikerê, birabiyîna winayîn nêbena.
Qûwetanê kurd şaran pawit
Serokê Şûbeyê Weqfa Kultur yê Haci Bektaşî Welî yê Anatolya Nûsret Tûnç’î zî hayr ant tarixî ser û va, eke wijdan û tersê homa yê şima esto se, şima qetlîaman rê vanê vinde. Tûnç’î da zonayen ke, rewşo ke Tirkiye nika têde ya, tarixê Tirkiye de ti wext nêbi û qiseyê xo wina domnay: “Bi tanq û topan kewnê sûkan miyan, qetlîaman virazenê. Tiya de dûştê şarê ma herb yeno ramiten. Nûsret Tûnç’î da zonayen ke, Sûriye û Tirkiye de alewî hedef de yê û wina va: “Eke Sûriye de qûwetê kurd nêbiyaybî, alewî, ereb, tirkmen dê pêrokîn ameyaybî qetilkerden. Tûnç’î da zonayen ke, welat kirêşenê ver kendalî.
DÎHA/SEMSÛR