Çend rojî verê bajarê Kerkûkî yê Îraqî de beyraqa Hukmatê Herêma Başûrê Kurdistanî ameybî aliqnayîş û aliqîyayîşê beyraqe ra dima zaf hetan ra reaksîyonî ameybî. Bitaybetî hukmatê Îraqî û dewleta tirk nêyî ver hukmatê Herêma Başûrê Kurdistanî tehdît kerdbî. Babete ser o avûkatê kerkûkijî qisey kerdî.
Avûkatan ra Arî Cebarî va ‘goreyê ma 2003 de prosesê azadî ke Îraq de ame destpêkerdiş ra dima qanûnan de problemê Kerkûkî bi hawayo baş nêame çareserkerdiş’ û wina domna: “Kurdî o wext wayîrê hêzî bî û şênayênê Kerkûkî sey bajarêk yê kurdan şinase bikerdênê. Goreyê mi ganî parlamenterê kurdî seba ke Kerkûk zî daxilê herêma Kurdistanî bibo, têkoşîn bidî. Çimkî Kerkûk hetê tarîxî de zî cayêk yê kurdan o. Cok ra qerarê aliqîyayîşê beyraqe goreyê mi qerarêko raşt o. Şar zî desteg dano nê qerarî. Nika ra pey ardişê warî yê beyraqe seba sîyasetê kurdî eyb o.
Bi ey çareser beno
Avûkatan ra Seyît Omer Kakayî zî wina va: “Heme dinya zî zano ke Kerkûk de hetê kultur, dîn û nîjadî de hetê cîya-cîyayî estî. Ewro bi aliqîyayîşê beyraqa herêma kurdan krîz vejîya. Dewleta tirk wazena ke wa beyraqe biancîyo war. Eynî çî seba Şengal zî derbazdar o. Kerkûk, Şengal û hetta Xaneqîn cayê ke tede nê munaqeşeyî yenî kerdiş î. Nê cayan de çareserî bi referandûm beno û ganî bêro viraştiş.” Kakayî dewamê qiseykerdişê xo de va ‘dewleta tirk hêrişê herêma Qendîlî kena û hukmatê herême vera nêyî de bêveng maneno’ û qiseykerdişê xo wina domna: “Senî ke çareserkerdişê problemê Kerkûk û Şengalî muhîm î, vera hêrişan de vindetiş zî hende muhîm o. Çimkî nê cayan de sîvîlî yenî qetilkerdiş û şar hetê ekonomî de zirarêko gird vîneno. Nika şarê Başûrê Kurdistanî krîzêko ekonomîk cuyeno. Hetta ke nê problemî çareser nêbî, vatişê ‘ma do dewletêk awan bikerî zî raşt nînî.”
RÊBAZ HESEN / ANF / KERKUK