Başûrê Kurdîstanî de bajarê Silêmanî de nizdîyê 120 westayê neqişkarîya altûnî (zerrn, zerd) estî û nê westayî seba ke meslegê înan vinî nêbo, paweyê destekî yî. Qaso ke yeno zanayene no mesleg hetê cihuyan ra bajar de bica bîyo.
Westayî dîyar kenî ke tasê ke tede altûnî yenî neqişnayene, verê cu Îngilizan ra ameyêne herînayene û înan o wext kîloyê nê tasan 415 Dînarî ra herînayêne. Labelê dima ra nê tasan Îran, Dubaî û Tirkîya ra herînayo.
Altûn heta ke yeno bazar roşîyeno, xeylê merhaleyan ra derbaz beno. Ewil mîyanê tasêk de 800-900 derece de yeno helênayene. Dima ra eyarê ci yeno dîyarkerdene. Eyarê altûnî qaso ke sêm û paxirê ke erzîyenî mîyanê ci, dîyar beno. Eyarê altûnî sey 18, 21 û 24 yeno dîyarkerdene. Çiqas altûn tede zaf bo, eyarê ci zî hende beno zêde.
Badê ke altûn yeno helênayene, erzîyeno mîyanê qalibê asinî û seba ke bibo serd, mîyanê awe de yeno verdayene. Dima ra erzîyeno mîyanê qalibê altûnênî. Westayan ra Kawe dîyar keno ke ê verê altûnî kenî parçe parçe û dima ra helênenî. Kawe dano zanayene ke dima ra altûn yeno şiwitene û rengê ci bedilîyeno.
Westayan ra Celal Lesur zî bale anceno rotişê altûnî ser û wina vano: “Seba ke teberê bajarî ra altûnê hazirî anî, rotişê westayan xeylê kêmî bîyo. Êdî wina bîyo ke westayî nêşênî altûn biroşî.”
SILÊMANÎ/ROJNEWS