2 rojî verê Yargitayî derheqê Doza Esasî ya KCKyî de qerarê xo aşkere kerd û qerar de cezaya 475 serrî ke dîyaybî 59 kesan ameye tesdîqkerdene. Kesê ke cezaya înan ameye tesdîqkerdene mîyan de parlamenterê HDPyî yê bi nameyê Leyla Guvene û Mûsa Farisogullari zî estîy.
Kongreya Komelê Demokratîke vera tesdîqkerdişê qerarî de îzehetêko nuştekî da. Kongre îzehetê xo de vato ‘qerar tarîxê huqûqî de do sey lêminîyêka girde bêro zanayene’ û wina dewam kerdo: “Hakim û dozgerê ke na doze daybî destpêkerdene û domnayene, heme tewqîf bîyî û mehkeme bîyî. Dozê sey Ergenekon, Balyoz û sewbîna heme berat reyde netîce bîyî. Labelê cezayê ke Doza KCKyî de ameyî dayene tesdîq bîyî. Îttîfaqo faşîst yê AKP û MHPyî hedef keno ke demokratîk sîyaset bitaybetî zî sîyasetê Kurdan çin bikero.”
Dewamê îzehetî de ameyo vatene ke bi tesdîqkerdişê Yargitayî îmkanê kerdişê sîyasetî werte ra ameyo wedarnayene û wina domîyayo: “No qerarêko cîyakar, nîjadperest û polîtîk o. No qerar do zirar bido demokrasî, huqûqo unîversal û bitaybetî zî biratîya şaran. Huqûq de cayê qerarî çin o. Hakim û dozgerê ke qerar dayî şar, komelê mîyanneteweyî û huqûqo unîversal de bîyî mehkûm. Ma veng danî Parlamentoyê Ewropa, Konseyê Ewropa û Milletê Yewbîyayeyî ke wa piştî bidî sîyasetê Kurdan yo demokratîk û vera nê qerarî de bivinderî. Se beno wa bibo, çîyêk nêşêno ma qerardarîya kerdişê sîyasetî ra biaçarno.”
AMED