Bajaranê Kurdan de roje çin a ke wesayîtê polîs û leşkeranê dewleta Tirkî nêdo merdiman ro. Heta nika bi desan doman, extîyar û extîyarî bi wesayîtê zirxinî ameyî qetilkerdene. Hîna çend rojî verê Taxa Emekî ya qezaya Rezanî ya Amedî de wesayîtêkê zirxinî dabî domano bi nameyê Efe Tekînî ro û Efe Tekîn merdbi.
Amed de reyna wesayîtêkê polîsanê Tîmê Taybetî (POH) da yew extîyarî ro. Wesayîtê polîsan da Hasan Hazarî (60) ro. Hazaro ke sereyê ci gina betonî ro, ame berdene bi Beşê Cerahî yê Mezgî yê Fakulteya Tibî ya Unîversîteya Dîcle. Ame musayene ke rewşa Hazarî baş nîya.
Bi taybetî çend serranê peyênan de sere de Amed, Şirnex, Mêrdîn, Mûş, Êlih û sewbîna cayan de bi desan merdimî netîceyê pirodayîşê wesayîtê zirxinan de ameyî qetilkerdene. Seba ke kerdoxî nînî cezakerdene, nê qetilkerdişî zî dewam kenî. n ANF / AMED