2 rojî verê namzedê Şaredarîya Stenbolî Bînalî Yildirim şibi Amed û ewja de qala Dêrsim û Kurdîstanî kerdbî. Vatişê Yildirimî ver, xeylê şîroveyî ameyî kerdene û reaksîyon ame nîşandayene.
Hemserekê Pêroyî yê HDPyî Sezaî Temellîyî û Parlamenterê HDPyî yê Amedî Musa Farisogullariyî derheqê vatişê Yildirimî de qisey kerdî û vera bêsamîmîyetîya Yildirimî de reaksîyon nîşan dayî.
Temellîyî va ‘vatişê Yildirimî de samîmîyet çin o’ û wina domna: “AKP hetê şarî de ca nêgêno û goreyê menfîetê xo mefhûman şuxilneno. Wexto ke nêro hesabê ci, nê vatişan terikneno. Nê vatişî verê cu hetê Erdoganî ra zî ameyî şuxilnayene. Labelê Erdoganî zî înkar kerd dima ra. AKP hetêk de vano Kurdîstan, heto bîn de zî Tetwan de tabelaya Kurdkî ano war, ziwanê Kurdkî înkar keno. Wexto ke hesabê weçînayîşî yeno kerdene, Amed de vanî Kurdîstan esto, labelê siba eşkenî Stenbol de vajî Kurdîstan çin o. Nê vatişan de samîmîyet çin o.”
Eke samîmî yî, wa bica bîyarî
Parlamenterê HDPyî yê Amedî Musa Farisogullariyî zî va ‘Yildirim çekuyan goreyê xo şuxilneno’ û wina domna: “Mi 12ê Kanûne de seba ke çekuyê ‘Kurdîstan’ û ‘Birêz Ocalan’î şuxilna, cezaya hişyarkerdişî dîya mi. O wext qîyamet qerfîya. Wexto ke ê şuxilnenî, problem nêbeno. Vernîya weçînayîşê Stenbolî de hewl danî weçînitoxanê Kurdan bixapênî. Wexto ke sîyasetmedarê Kurdan nê çekuyan bişuxilnî, qîyamet qerfnenî. Eke siba disibayî seba Birêz Ocalanî vajî ‘Rayberîya ma’ şaş memanê. Eke ê samîmî yî, wa waştişanê Kurd û Kurdîstanî bica bîyarî.”
AMED