Amedî do qet vîrî nêkî
Serekkomar Erdogan û AKPe encamê weçînayîşê 7’ê Hezîrane hezm nêkerdbî û bira weçînayîşo verwext girewtbî. Rayna Erdogan û îqtîdara AKPe 7’ê Hezîrane ra dima konseptekî şerê lêminî daybî destpêkerdiş û çarçiweya no konseptî de bi seyan welatijê sîvîlî cuyayîşê xo daybî. No sero weçînayîşo verwext 1’ê Teşrîne yanî vizêr ame viraştiş û zafaneya welatijan şîyî sindoqan ser û rayê xo xebetnay. Namzedê wekîlîya HDPe ya Amedî Îdrîs Baluken zî raya xo qezaya Yenîşehîrî ya Amedî de xebetna û dima zî îzehetekî da.
Do bibo verpers
Baluken îzehetê xo de verpers da vatişê serekkomar Erdogan ke vatênê ‘Mêrdek vejyayo vano Amed, Amed çîyo?’ û wina vat: “No sindoq do êy ke nêzanî Amed yeno çi manaye rê do bibo verpersekî gird. Bi no sindoqî do yewna ray vîrî nêkî ke Amed yeno çi manaye. No weçînayîş weçînayîşekî dîrokî yo. Ez bawer kena ke no weçînayîş do azadî, aştî û demokrasîye xo reyde bîyaro. Rayna ma bawer kenî ke êy ke serkewtişê 7’ê Hezîrane hezm nêkerdî, do rayna çîyo inasarên nêkî. Ma hêvî kenî ke no weçînayîş do peynîya konsepta şerî ke weçînayîşê 7’ê Hezîrane ra dima dekewtbî dewre, bîyaro.”
DÎHA/AMED
Erebeyê bêplaka dormarê mektebe de çi gêrenî?
Welatijî semedê weçînayîşê pêroyî vizêr şî ser sindoqan, rayanê xo xebetnay. Sey her ray vizêr zaf cayan de sindoqanê weçînayîşî de dek û dolabê hêzê AKPe estbî. Senî ke weçînayîşê 7’ê Hezîrane de semedê tirawitiş û bedilnayîşê rayan erebeyê bêplaka mekteban vero vindete bî se, vizêr zî nêyî erebeyê bêplakaye vernîya mekteban de vindete bî. Nînan ra yew zî Artemêta Wanî de amey cuyayîş. Babete sero welatij Şîfa Batur qalî kerd.
Batur derheqê babete de ciresna ke weçînayîşê 7’ê Hezîrane de hîna cîya bi û wina vat: “Weçînayîşê 7’ê Hezîrane de mektebê Kazim Karabekîr ke keyeyê min ra 30 metre nêzdî yo de min raya xo xebetnay. Kaxizo ke sero nameyê mekteba ke ez raya xo bixebetna nuştênê û mektebê ke min tede raya xo xebetnay, nameyê înan yewbînan ra cîya bî. Rayna dormarê mekteba ke min raya xo tede xebetnay zî erebeyê bêplaka estbî. Wexto ke ez dekewta mekteb min na erebe dî, labelê wexto ke ez mektebe ra vejîyaya erebeyî cayê xo de nêbî.”
NAVENDA XEBERAN
