AKP hurendîya Hemşaredaranê Sûka Pîl yê Amed Gultan Kişanak û Firat Anli qeymekan Cûmalî Atîlla tayîn kerd. Atîlla ke bin ablûqa û bi seyan polîsan roja verî şi şaredarîya Amed xesp kerd, şaredarî açarna qereqolî. Bi seyan polîsî zerreyê bana şaredarî de bi ca bî. Verra qeyûm Atîlla nûmayişê protestoyî yê Amedijan zî ramenê. Parlementerê HDP, gurekarê şaredarî û bi desan welatijê ke vizêr ver bana şaredarî de amey pêhet, verra derbeya AKP nêrazîbîyenê xo damûsna.
Parlementeranê HDP yê Amed Nûrsel Aydogan, Feleknas Ûca, Sîbel Yîgîtalp, gurekarê şaredarî ra pîya xêlê kesî ver banê şaredarî de amey pêhet û damûstayîn day. Aydogan ke qisey kerd vist vîrî ke hikûmeta AKP ke wazena tekoşînê aşitî tesfiye bikero, bi zorê polîsî û bi quwetê dewlet dest na şaredarî ser o. Aydogan va dest ronayişê îradeyê şarî ser, xespkerdişê îradeyê şarî yo.
‘Şarê Amed şarekê polîtîk o’
Nûrsel Aydogan da zonayen ke AKP çîyo ke bi sondiq nêşa bifîno dest, nika bi quwetê zorî wazena bifîno dest û wina dewam kerd: “Hadreyînî rewna ra kerdî. Çapemenî girotî, no welatî de çapemenîya azad nêmend. Amedî de înternet birnay ke dinya qewimyayişan ra xeberdar nêbo. La şarê Amed bîyayişan resna her cayê Tirkîye.“
Aydogan hayr ant ser îcratanê qeyûm Atîllayî ser û wina va: “Amedijî şarekê polîtîk o. Rind zano ke wayîrê kamî bivejyo. Şarê Amed bi beleş weniştişê otobusî ra nîna xapînayiş. Şarê Amed tenya çîyekê paweno, o zî no yo ke AKP şaşîya tarîxî ra peyser ageyro. Wa bîrê sondiqî ronê û weçîntayiş virazê û bivîne ke şarê Amed kamî tercîx keno. Şarê Amed do qeyûmî nêsilasno.”
Parlementer Aydogan aşkere kerd ke şarê Amed do her şiklî îradeyê xo rafîno werte û va, “Qeyûmo ke tayînê tîya bîyo, wa odeyê xo de çay şimitişî ra dewam bikero.”
ANF / AMED