Wezîrê Karê Zerrîn Suleyman Soylû ke hurendîya Efkan Ala de tayîn bi, aşkere kerd ke o do 20ê Mijdare de şiro Amed û heta aşma Adare ewja de bimano. Amedijê ke Soylû rê nêrazîbîyayen damûsnay vatî ma ey sûk de nêwazenê.
Ronişteyanê Amedî ra Hamza Sagir bi persa ‘ameyişê Soylû do ma rê çi feyde bîyaro’ nêrazîbîyayenê xo damûsna û va, ‘Xeynê xesarî û bêaramîye Soylû do teba nîyaro.’ Sagirî vist vîrî ke 30 serrîyo ke na dewlet kurdan kişena û wina va: “Wa ê bizanê, ê nêşenê ma biqedînê. Zey şar, meseleyanê xo ma xo bi xo çare kenê. Ma emel nêkenê ke ê meseleyanê ma hal bikerê.
‘Ma nêwazenê wa bîro’
Welatijê bi nameyê Cahît Tûranî zî şîyayişê Soylû yê Amed zey vêşîbîyayişê hêrişan hesibna û va ‘çîyo ke nika ciwîyayîyeno OHAL nîyo rewşa îstîsnayî yo. Hedefê ameyişê Soylû de şikitişê îradeyê ma esto. Ma ey nêwazenê.’ Tûranî da zonayen ke ê çiqesî bi na rengî nezdî bibê, kurdî zî dê wayirê pê bivejyê.
‘Merdimê Tansû Çîller o’
Welatijeke bîn ke nêwaşt nameyê xo bido zî vist vîrî ke Soylû merdimê Tansû Çîller yê yewî yo û va, ‘polîtîkayê a demî yê dûştê kurdan nika zî Soylû dewr giroto.’ Welatijî aşkere kerd ke dewlet çarekerdişî kiştişê kurdan de vînena û ard ziwan ke iyê dê nê hesaban tarûmar bikerê.
AMED