O roc ra nata, heta ke ci ra bi cebilxanîye, peran, kampan de perwerdekerdiş û bi sînoran ra derbaskerdişê endamanê înan paştî dano DAIŞî. 

Ma zanê ke waştişê AKPî ne vistişê rejîmê Esedî yo ne zî ardişê rayveberîka muhalîf e bîne yo. 

Tenê wazeno rayveberîya ke surîye de rûneyo bi qirkerdiş û asîmîlasyon kurdanê Rojawanî ser de şêro û destkewtişê ke şarê kurdî bi têkoşîna xo vistê xo dest înan ra tepya bigîro. La senîn ke şarê kurdî bi hişmendî û yewîtîyêka tarîxî heme waştişê înan û dagirkeranê zey înan veng vetî, bi ay awayî têkoşîna xo domnenê û ko bidomnê. 

Ma vînenê ke enî rocan dagirker û desthilatî rast ro serkewtişanê şarê kurdî yê tarîxî yenê û serkewtişê înan dir zî rast ro têkşîyayîşê xo yenê.

A yewe ra zî çime sûr benê û semedê xirakerdişê nê serkewtişan çi destê înan ra yeno texsîr nêkenê.

Têkoşerîya şarê ma bi Kobanê sînorkerde nêmende û bi rayîrê weçînayîşê hewtê hezîranî qada sîyasî de zî îradeyê xo moşt dinya. 

AKP yo ke tersê serkewtişê Kobanê kewtibi ey ser bi anketanê ke ameyne kerdişî zî serkewtişê HDPî texmîn kerdêne. 

A yewe ra bi awayêke waşt ke weçînayîş bibetelyo û kurdan mecbûre şerrî bikero û bi ay awayî dewletanê dinya ra vaco ke kurdî teberê şerrî de çîke ra fam nêkenê. Mexsedê ey o bi ke bi provaksîyonê Agirî ra bigî heta zerrey mitîngê Amedî de teqnayîşê bomba kurdan bi awayêke banco mîyanê şerrî la kurdî bi hişmendî û bi îstîkrar tê geyrayî û înan rayêka bîne kaye ey veng vete. Bi teqnayîşê bomba çarsey ra zêde gedeyî, cênî, extîyarî û ciwanî birîndar bî û çar tenî zî şehîd bî.

La eke mudaxileyê vatişkî yê pêşkêşvanê sehnî nêbîne û şarê ma bi awayêke bi dîsîplîn tê nêgeyrayne ko humara şehîdan û birîndaran pîya di hîri qat zêde bibayne. A yewe ra ma spasdarê pêşkêşvanê sehnî û şarê xo yê û bi înan îftîxar benê. Helbet hewldanê desthilatan dimayê weçînayîşî zî verdewam kerd û bi destê hemkaranê xocayî qetlîamêke bîn serê şarê ma yê Amedî de ame kerdişî û hîrê canê ma ameyî şehîdkerdişî. 

Mexsedê ay êrîşî zî o bi ke kurdan bi kurdan bidê qirkerdişî la hetê şarê ma ra o zî veng ame vetişî. 

Dimayê ey heme hêrişanê AKPî ro kurdan ser kurdan bi girotişê Girê Spî Rojawan de serkewtişêke zehf muhîm kerd xo dest û etya ra tepya têkoşîna şarê kurdî ko heme plan û projeyanê desthilatan veng veco û ko şarê kurdî bi ser biko û heme merdimahî bi ser biko. Serkewtişê şarê kurdî ro heme merdimahî pîroz bo.


Nesrîn NAVDAR