Kesê hetanî vizêr dişmenînê kurdan kerdê, nika bi kêfweşîna qalê xoverdayinê kurdan ê vera çeteyanê DAIŞ kenê. Şarê bindestê jî xoverdayinê Kobanê zey ê xo vînenê. Kobanê xoverdayinê vera zilmî, vist vîrê herkesî. Bi sembolê xoverdayinê vera zilm û faşîzmî.

Bi xoverdayinê destanî ê YPG-YPJ û şarê Kobanê, dîrok vuriyê. Kobanê hinî bi mîlad. Hinî kam qalê xoverdayinê vera zilmî bikiro, Kobanê bêro vîrê merdiman.  Bê çeteyanê DAIŞ, dostê înan dewleta tirk û hetkarê înan, herkes xoverdayinê Kobanê, zey serberzîna însanîn ê vera zilmî vînenê. Coka heme ca, qandê Kobanê xomûsnayin û çalakiyan virazenê.
Helbet hetanî nika jî, qandê kurdan teverê welatî di, bol xomûsnayin û çalakî viraziyay. La belê fina siftayino, hend cayanê zaf xomûsnayin û çalakiyê viraziyenê. Miletanê bînan ra, hend zaf kesî tewrê xomûsnayin û çalakiyan benê.
Afganistan, Meksîka, Arjantîn û xeylê cayanê bînan, miletanê wijay bi xo, çalakî organîze kerdî.  Bi ziwan û lehçeyanê ciya ciya ê cîhaniya xoverdayinê Kobanê silam bi û beno.
Xoverdayinê Kobanê, çeteyên DAIŞ û dostê înan rayverê dewleta tirk şaş kerdî. Serokkomarê tirk Tayîp Erdogan hesabê kewtinê Kobanê kerdê. Coka vatê “Kobanê ewro meşt kewno.” Çeteyanê DAIŞ xeyal kerdê roşanê qurbanî di Kobanê bigirê binê kontrolê. Erdogan jî zey înan fikiriyayê.
Ey jî xeyalê hetanî roşan Kobanê bikewo, kerdê. La belê Kobanê hem hesab û xeyalê DAIŞ û hem dostê ay Erdoganî xeripina. Nameyê kurd û Kurdistanî kerd berz. Vengê kurd û Kurdistanî vilayê heme cayê dinyay kerd.
Xoverdayinê Kobanê ser, fikrê kes û siyasetê dewletan ê vera kurdan vuriya. Serokdewletê Fransa François Holland werîşt vat: “Kobanê sembolê xoverdayin o”. Nunera Berz a siyasetê Tever û Ewlekarîn ê Jûwîna Ewrûpa Caterîne Ashton vat: “Kobanê xoverdayinê vera zilmî mûsna ma pêrin.”
Zey Holland û Ashton bi desan rayveranê dewletanê girdan, eleqe ant muhîmînê xoverdayinê Kobanê ser. Xoverdayinê Kobanê, dostîna dewleta Tirk û DAIŞ jî rafînê çimanê cîhanî ver. Ferqê kurd û tirk jî mûsna welatijanê Ewrûpa.
Verî wexto ki ma vatê “ez kurd a”, înan “tirk” fam kerdê. La belê nika, hinî fam nêkenê. Ma zey parçeyê mileta xoverdayoxanê Kobanê vînenê.  Bi vatena bîna Kobanê ma “tirk vîniyayin ra xelsinaymi. Spas YPG/YPJ û spas Kobanê.

Mehmet DREWS