Parka Millî ya Muzirî ke tede çimeyê awa pake, tewirê nebatanê xoserî û cuya tebîî esta, qismêkê ci keweno mîyanê 43 hezar û 350 dolimî ke sey wareyê madenî ameyo îlankerdene. Çend dewê ke girêdayeyê Pulûrî yê û nizdîyê Çimeyanê Muzirî yê û dewa Geyîksûyû û gomê Sînî yê ke girêdayeyê Dêrsimî yê seba cigêrayîşê altûn, paxir û sîmî sey wareyê cigêrayîşê madenan ameyî îlankerdene, ruhsatê nê sehayan dîyayî şîrketêkê taybetî.
Verfeka Meclîsê Cinîyanê HDPyî ya Dêrsimî Nurşat Yeşîle bale ante projeyanê madenî yê şaristanî ser û va ‘eke projeyî bêrê bicaardene do çimeyê awa pake, cuya xozayîye û tebîetê Dêrsimî vînî bibê’. Yeşîle dîyar kerde ke cayê ke benî cayê cigêrayîşê madenî, ê cayan de cuye nêmanena’ û wina dewam kerde: “Ganî dêrsimijî vera projeyanê ke yeno waştene bêrê bicaardene de vengê xo berz bikerê. Texrîbato ke Koyanê Kazî de ameyî kerdene, heman texrîbatî yeno waştene ke Dêrsim de zî bêrê kerdene. Ma do têkoşînê xo bidomnî.”
Yeşîle veng da dêrsimijanê ke teberê bajarî de yê û wina va: “Eke şima wazenê gama ke hamnanî bêrê tîya nê xasekîyan reyna bivînê, ganî ma heme vera nê projeyan de têkoşîn bidê. Cayo ke tebîet qedîyayo ûca de ciwîyayîşê merdiman mumkun nêyo. Eke ma têkoşînê hemparî bidê ma do bi ser bikewê.”
Hedef bêmerdimverdayîş o
Serekê EMEPî yê Dêrsimî Ergîn Tekînî zî da zanayene ke eke proje bikewo dewre, o wext texrîbatê girdî bibî û wina va: “Eke tebîet talan bibo, gandarî tîya ra koç bikerî û merdimî zî do nêmanî. Ganî şar, dezge û partîyê sîyasîyî pîya têkoşîn bidî.” Serekê qezaya Merkezî ya Dêrsimî Huseyîn Yolukî zî va ‘bi nê projeyî rindîyê Dêrsimî do pêşkêş biancîyî sermayedaran rê’ û wina dewam kerd: “Dewlete bi hawayo zanaye kena. Ma do înan raya pêroyî de teşhîr bikerî. Ma do pîya têkoşîn bidî.”
MA/DÊRSIM