Kemal Gun o ke seba girotişê cenazeya lajê xo Dersim de Meydanê Seyîd Riza de 90 rojî grevê veyşanî de mend, seba dermankerdişî wedarnîya nêweşxaneyê Fakulteya Çapa Tibê yê Zanîngeha Stenbolî.
Gerîlayê DHKCyî Mûrat Gun, 7ê Mijdara 2016î de netîceyê bombevarnayîşî de bi 11 embazanê xo, mintiqaya Newaya Çat ê Dersimî de weşîya xo kerd vinî. Pîyê ci Kemal Gun zî seba ke cenazeya lajê xo Mûratî bigîro Meydanê Seyîd Riza de kewt grevê veyşanî û 90 rojî nûmayîşê xo domna.
90 rojan xover da
Seba ke Apê Kemal nûmayîşî ra fek verado xêlê sazî û dezgehan veng da. La Apê Kemal goş nêda nê vengdayîşan û heta ke cenazeya lajê xo bigîro xover da. Apê Kemalî 90 rojan ra dima cenazeya lajê xo girot. Teslîmgirewtişê cenaze ra dima Apê Kemalî grevê veyşanî verada û seba dermankerdişî wedarîya Fakulteya Çapa Tibê yê Zanîngeha Stenbolî.
Apê Kemal wextê grevê veyşanî de 74 kîloyan ra gina 56 kîloyî. Weşîya ey merhaleyê talokeyî de ya û jew çimê ey rind nêvîneno.
STENBOL