Partîya Demokratîke ya Şaran amadekarîya weçînayîşê 24ê Hezîrane domnena. Namzed û xebatkarê HDPyî sere de Dêrsim, Gurgum, Meletî, Amed û Şirnex û xeylê cayanê bînan de şarî reyde ameyî têhet. Bi şewe û roje xebatî yenî kerdiş û HDP hewl dano xo biresno heme cayan. Namzedî dîyar kerdî ke ê do keyeyêk daxî pey xo de nêverdî û şêrî bêrê herkesî. Çarçewaya amadekarîya weçînayîşê 24ê Hezîrane de lez dîyayo xebatanê weçînayîşî û Vakurê Kurdistanî, Tirkîya û Ewropa de xebatî vejîyayî dûştêko berz. Her roje cîya cîya hetan de buroyê weçînayîşî yenî akerdiş, esnafî yenî zîyaretkerdiş û sewbîna tewir xebatî dewam kenî. Bi des hezaran merdimî beşdarê xebatan benî û xebatî bi coşêko gird dewam kenî. Cayê ke tede xebate de yenî kerdiş bajar bi bajar wina yî. DÊRSIM Bajarê Dêrsimî de zî lez dîyayo xebatanê weçînayîşî. Heta nika buroyê akerdişî, zîyaretê esnaf û keyeyan û sewbîna tewir bi tewir xebatî ameyî kerdiş. Nika zî seba pawitişê sindoqan muşahîtî yenî wezîfedarkerdiş. Seke yeno zanayîş do Dêrsim de zî 56 sindoqî bêrî kiriştiş. Nînan ra 48ê ci Pîlemûrîye, yê bînî zî Mazgîrd, Xozat û Pulurî de yî. Babete ser o namzeda HDPyî ya Dêrsimî Meral Hanbayat Yeşîle va ‘cayê ke sindoqî yenî kiriştiş de zafaneyê ci weçînitoxê HDPyî yî. Sindoqan bikirêşî zî ma do wayîrê sindoqanê xo bivejyî. Tîya de berpirsîyarîyêka girde kewena vileyê ma. Wa herkes heta 3ê Hezîrane seba muşahîdîye muracat bikero.” GURGUM Namzedî seba ke bajar ra parlementer bivejî, xebatanê xo domnenî. Na çarçewa de qezaya Pazarcixî de namzed û şar ameyî têhet. Cayo ke zafaneyê ci elewî yî de, şar bi coşêko gird şi namzedan ver. Namzedan problemê şarî goşdarî kerd. Namzedan ra Recep Kayayî va ‘ma seba ke problemanê şarê xo çareser bikerî, şima ra destek wazenî’. MELETÎ Namzed û îdareyê bajarî şarî reyde ameyî têhet û Taxa Haniminçîftlîgî de buroyê weçînayîşî akerdî. Reyna namzedî taxanê Kurecîk, Aksut, Kasimuşagi, Develî, Sarihaci, Çakillipinar û Harunuşagi de xebatî kerdî. Bitaybetî cinîyan eleqeyêko gird nîşanê namzedan da. Namzed Mehmet Tuncelî wina va: “Ma do hewl bidî bi destekê şarê xo demokrasî û aştîye bîyarî. Ma zanî ke destekê şima pey ma de yî. HDP do bi destekê şima bendê weçînayîşî derbaz bikero û Selahattîn Demîrtaş bivejîyo teber.” RIHA Çarçewaya xebatanê weçînayîşî de qezaya Curnê Reşî yê Riha de zî buroyê weçînayîşî ame akerdiş. Şar eleqeyêko gird nîşanê namzedan da. Dima ra yew firina nane ameye zîyaretkerdiş û ewja de nana ke ser o HDP nuştêne, ameye dîyarkerdiş. Firine de ame vatiş ke ‘şima bî bingeh, nika zî şima bi pêşkêşkerdişê nane, gan danî cuya neweyî’. MERKEZÊ XEBERAN