Artêşa Tirkî domanêk qetil kerd

Zext û tedayê dewleta Tirkî sînorî ser o dewam kenî. Heta nika xeylê kesî sînorî ser o ameyî kiştene û kesê ke nînan kenî zî qet hesab înan ra nîno perskerdene. Colemêrg de dewijê ke bazirganîya sînorî kenê, raştê hêrişê artêşa Tirkî ameyî. Helîkopterî dewijan ser o bombeyî reşanayî. Netîceyê hêrişî de domenêko 14 serrî ame qetilkerdene.

Ame zanayene ke vizêr dewijê dewa Çemekurkî ya qezaya Derecîkî yê ke bazirganîya sînorî kenê, gama ke Başûrê Kurdistanî ra agêrayêne, raştê hêrişê artêşa Tirkî ameyî. Netîceyê hêrişê helîkopterî de Vedat Ekîncîyo 14 serrî merd û dewijan ra yewe zî bi giranî birîndar bi.

Seba ke hêzê Tirkan yê ke xeta sînorî de sucan kene nênê cezakerdene,  qewimîyayîşê winayên zêdîyenê. Dewa Roboskî ya qezaya Qilebanî ya Şirnexî de teyareyanê şerî yê artêşa Tirkî 28ê Kanûna 2011î de qetlîamêk viraştbî û netîceyê ê qetlîyamî de 19ê ci domanî pêro pîya 34 kesî ameybî qetilkerdene. 

 ANF/COLEMÊRG