Înîsîyatîfê Rojnamegeranê Azadan (OGÎ) raporê xo yê aşma êlule aşkere kerd û rapor de ca da neheqîyê ke vera rojnamegeran de bîyî. Rapor de ameyo vatene ke êdî wina bîyo ke viraştişê xeberanê rojaneyan zî suc hesibîyeno.
Rapor de ameyo vatene ke xebera ‘Rîze de birîyayîşê darêk’ û reyna xebera ‘Pîyo ke nêşêna lajê xo rê şalan bigîro, întîxar kerd’ suc hesibîyayî û her di muxabîrê ke xeberî viraştî, bi şertê kontrolo edlî serbest ameyî veradayene.
OGÎye raporê xo de vato ‘selahîyetê neweyî dîyayî RTUKî û êdî weşanê ke înternet ser o domîyenî zî do bêrî kontrol kerdene’ û rapor wina dewam kerdo: “Nika ra pey do radyo û televîzyongêrîya înternetî zî bigîrîyo binê kontrolî. Yê ke RTUK ra ruhsat nêgiro, do nêşênbo weşan bikero. Yê ke bivejîyo teberê qeydeyanê RTUKî, do weşanê ci bibirîyo. Ruhsat zî do hetê RTUK û MÎTî ra bêro dayene. Bi no qeyde warê azadî hîna zaf ameyî teng kerdene.”
Wa rojnamegerî serbest veradyî
OGÎye raporê xo de ca dayo rojnamegerê tewqîfbîyayeyan û wina vato: “173 rojnamegerî tewqîfbîyaye yî. Aşma êlule de 4 rojnamegerî tepişîyayî û nînan ra rojnamegerêk tewqîf bi. 110 rojnamegerî ameyî mehkeme kerdene, rojnamegerêk rê doze abîye û derheqê 4 rojnamegeran de tehqîqat abi. 5 rojnamegeran rê 21 serrî 3 aşmî cezaya hepsî, 4 rojnameran rê 27 hezar TL cezaya pereyî dîyaye. 53 rojnamegerî karî ra ameyî girewtene yan zî îstîfa kerdî û 11 rojnamegerî zî tehlîye bîyî.”
Rapor de ameyo waştene ke wa rojnamegerî tewqîfbîyaye, serbest bêrî veradayene.
MA/AMED