Linga ma kî nêgina hardê ma, zonê ma zonê Xizir kî nêno ra zon.
Çond reyê binê linganê hukimdaran de mend hardê ma, dewê ma, warê pî û qalîkanê ma.
Dewan ra du bî berz, koyî bêveng mendî.
Waxtan ra jû waxt çemê Perî est bî. Vengê ci domanan rê sanike bî. Kam çi zoneno, kam awa Perî ra
simit, kam riyê xo şut. Kam cirê derdê xo berba. Kam cirê xeyalê xo ard zon. Awa Periya ke vengê
koyan serra biyene berz, nika bêveng biya. Herediya mordemiya ma ra. Gos biderê ci hala savana?
Jû bendê hukimdaran raya awa Perî gureto. Besenêkana xorê şero bireso Dîcle.
Iyê ke virara Perî de biyê pîl, feteliye nika kotiye? İyê ke wusar a piya vengê Periya hewn
kerdê, kotederê? Vanê sono kot va so, hardê mordem venga ci dano? Sima vengê Perî heşîne pê?
Dewike serranê 90 de kerdi tol, virniya Perî guretena reyna kerdî tol, ray û olaxê dewan guretî.
Perî bi hersê xoya her çî guret binê awe de kerd vînd.
Tayê vanê ci xêrê hardê hûsk marê esto. Vanê dûste tayê pere de biderê me şîme.
Vanê warê pî û qalikanê ma vînd bo. Hard ke şî, zon û kulturê jû homete ke beno vînd sono.
Pîlema vanê, zonê ma zonê Xizir o... O waxt tilsemê zonê ma welatê ma wo, tîja hometa.
Welatê ma zonê ma wo, dar berî ma wo, hardê ma, vengê çemanê ma wo.
Perî ameyena domanan bî, ci ra guretî. Tarixê Dêrsim bî, nika çarnayê lîme. Orhan Bakir vengê awa
Periya hewnê xoyê rindek de bî, nika îp-îsiz biyo hardê xoverdayoxan.
Ayhan û Adîle Arduç avê verva bendawe vejiyayî. Çeyê xo, warê pî û qalikanê xo canêverdayî. Bi
asmana bêrayî mendî, onca kî dewa xo, hardê xo bêwayîr nêverdayî. Serva hardê xo erzenê xover.
Verva hukimdaran vejîne. Verva kolonyalîstan vengê omed kenê berz. Perî de omede de newe kenê
pîl. Bara ma kî vengê xo vengê înan serkîme, laşerê vengan qilerê bendan bicero bero zerrê çeyê yî hukimdaran pir kero. Qirrayisê Perî û malbata Arduç pêhesiyê, bêveng mevinderê.
Meral KUÇUK