Salîh Altunişik 28 serrê ke hepisxaneyî de maneno û seba beşdarîya cenazeya kêna xo bi destûrî hepisxane ra vejîya la destûr nêdayî ke mezela kêna xo zîyaret biko, hewna astengî vetî ke Altunişik tazîye de bi Kurdî qise biko.
METÎN YOKSU / MA / AMED
Hepso sîyasî Salîn Altunişik (69) 28 serrê ke Hapisxaneyê Tîpa T ê Amedî de maneno, kênaya Salîh Altunişikî, Zeynep Altunişik (34) cuya xo da. Avûkatê Altunişikî zî seba beşdarîya cenaze rayberîya hepisxaneyî ra waştişname dayê la dozgerî peynîya qedyayişê tazîyeye destûr da. Seba Altunişikî ra taziye 3 rojê ra ame 4 rojê ra dergkerdiş.
Altunişik bi dorpêça polîs û cendirmeyan beşdarî taziye bî la şîyîşê mezela kêna xo ser Altunişikî ra astengî vetê û cayê taziyeye de zî destûr nêdayî ke Altunişik kesê ke seba serweşîye ameyî de Kurdî qise biko. Babete ser Dayîk Selîme Altunişik qise kerd.
Qeyum karî ra vet
Selîme Altunişik vat ke serra 2016î de kêna a bi îdiaya beşdarîya çalakîyê HDPî qeyum karî ra veto, no ser kêna ci de stres dest pê kerdo û peynî zî mezgê ci de tumor vejîyeyo û wina vat: “7 serrê verî yew domanê min zî wina cuya xo da. Ma seba Zeynepe bi silgirîya avûkatan rayberîya hepisxaneyî ra serpiro da, peynîya qedyayişê tazîyeye waştişê ma qebul kerdî, ma zî rojêk tazîya xo derg kerd. Seba ke Salîh 28 serrê ke hepixaneyî de yo zaf kes waştî ey bivîno la cendirmeyan destûr nêdayî û cayê tazîyeye zî girewtê binê dorpêçe.”
Destûr nêdayê şîro mezele ser
Altunişik aşkera kerd ke seba dergmendişê hepisxaneyî de Salîn ser o ê newe ra dariznayişî ser o serpiro dayê û wina domna: “Salîh DGMî de dadger û dozgerê lejkeran ra ame dariznayiş, dariznayişê ci zî bi derg domya bî. Na babete de AÎHMî ra qerarêk vejîya û Tirkîya ame mahkumkerdiş, Salîh binê îşkenceyî de mendbî û delîlî ke zî ameyî komkerdiş heme bêqanûnî bîyê û Tirkîya zî tazminat daybî. Ma serpirodayişê xo do bibê AYMî ra.”
Desûr nêdayî Kurdî qise biko
Altunişik tewro peynî wina qedîna: “28 serrê ke Salîh hepisxane de yo, qanûnî ke ey mehkum kerdî ewro zî destûr nêdayî ke şîro cenazeya kêna xo ser. Salîh waşt mezela kêna xo bivîno la destûr nêdayî, kesê ke nêameyî tazîye waştî telefon reyde qise bikê la destûr nêdayî ke telefon de Salîn bi Kurdî qise biko. Desûr nêdayî ke Salîh dejê xo bar biko. 9 saet destûrî ra tena 4 saet eşkîya bişuxilno.”