Tecrîdo ke Rayberê Şarê Kurdî Abdullah Ocalanî ser o yeno domnayene, her ke şono beno giran. Babete ser o dayîkê mêrdînijî reaksîyon nîşan dayî û dîyar kerdî ke heta ke Ocalan azade nêbo aştî û azadîye nînî. Heto bîn de gerîlayê HPG û YJA Starî yê Qendîlî ke vera hêriş û dagîrkerîya dewleta tirkî de xover danî, rojeva înan ya esasî tecrîd o û hesretîya xo ya Ocalanî anî ziwan.

Tecrîdo ke Rayberê Şarê Kurdî Abdullah Ocalanî ser o yeno domnayene, her ke şono beno giran. Ocalanî tewr peynî 11ê Êlula 2016î de keyeyê xo reyde pêvînayîş kerdbi. O pêvînayîş ra nata 83 muracatî ameyî red kerdene. Reyna 770 muracatê pêvînayîşî yê avûkatan zî bi mehneyanê ‘rewşa hewayî baş nîyo’, ‘keştîye xirabe ya’ û ‘OHAL’ ameyî red kerdene. Vera tecrîdî de reaksîyonê kurdan dewam kenî.

Cinîyê mêrdînijî babete ser o qisey kerdî û dîyar kerdî ke seba awanbîyayîşê aştîye, ganî Abdullah Ocalanî reyde pêvînayîşî bêrî viraştene. Cinîyan ra Xewlet Oncuye daye zanayîş ke seba aştî û azadîye ganî berê Îmrali bêrî akerdene û wina domnaye: “Eke Ocalanî reyde pêvînayîşî bivirazyî, o wext mergî zî do bivinderî. Zulm ancax wina qedîyeno. O aştî û azadîye wazeno û ma zî wazenî ke wa o azade bibo. Ma dayîkî do qet tecrîd qebul nêkerî. Kam ke vajo ‘ez aştî û merdimî pawena’ ganî vera tecrîdî de bivindero.”

Cinîyan ra Semra Albaye veng daye heme kurd û cinîyan û wina va: “Ma nêzanî cuyeno an nêcuyeno. Bi serran o bêxera şermizarkerdişî, sewbîna çîyêk destê ma ra nîno. Ganî ma êdî bêveng nêmanî. Eke ewro krîzêko hende gird esto, sebebê ci tecrîd o.”

 

Ma wazenî xebere bigîrî

Tenzîle Agataye zî va ‘ma wazenî ke Ocalanî ra xebere bigîrî’ û wina dewam kerde: “Seba ke ma ra tersenî, tecrîdî hende giran kenî. Ê wazenî vajî ‘ma do bi domnayîşê tecrîdî, zulm û zextî zî bidomnî’. Labelê ma do heta peynî xoverdayîşê xo bidomnî.”

 

Rojeva esasî ya gerîlayan tecrîd o

Heto bîn ra vera Başûrê Kurdistanî de hêriş û dagîrkerîya dewleta tirkî bêmabên dewam kenî. Dewleta tirkî bitaybetî hêrişê Biradost, Xakurkê û sewbîna cayanê Başûr kena û hewl dana herêma Qendîlî bierza binê kontrolê xo. Gerîlayê HPG û YJA Starî zî nê averşîyayîşan bi hawayo baldarî taqîp kenî. Gerîlayan heta nika derbê girdî dayî artêşa tirkî ro û artêşa tirkî çend reyan mecbûr mende ke leşkeranê xo tepîya bianco.

Wexto ke merdim vera xo dano hetê yewîyêka gerîlayanê YJA Starî, yeno dîyayene ke gerîlayî kovaran ra nuşteyanê serbestan wanenî û prosesî ser o sohbetan kenî. Ewja de yewna rey yeno dîyayene ke rojeva esasî ya gerîlayan tecrîdo ke Rayberê Şarê Kurdî Abdullah Ocalanî ser o yeno domnayene yo. Her gerîlayo/a ke yewîye mîyan de ca gêno, hesretîya xo ya Ocalanî ano ziwan û gerîlayan heta peynî seba têkoşînî sondwerde yî. Reyna gerîlayî vera dagîrkerîya dewleta tirkî ya Başûrê Kurdistanî de hêrsin î û vera bêvengîya hukmatê Başûrî de zî reaksîyonin î. 

 

MERKEZÊ XEBERAN