Her ziwan wayîrê ercêkê komelkîyî yo. Zereyê sînoranê welatêk de mintiqe, kar, bawerî, mewqî û sinife ra gore qiseykerdişê ziwanêk vurêno. Ziwano standard formo hempar yê ziwanêk o ke ê qiseykerdoxê ziwanî pê yewbînan fam kenê.
Kurdî hetêk ra xo mîyan de bi dîyalekt û formanê cîyayan qisey kenê, la hetêna ra ziwanê kurdan hetê serdestanê zordaran ra bi desan serran ameyê qedexekerdişî (yasaxkerdişî). No qedexe bîyo sebeb ke ziwanê kurdkîyî nêeşkê aver şirê û asîmîlasyonî dir rî bi rî mendê. Nê formanê kurdkî ra vakûrê (zimeyê) welatê ma de ya ke polîtîkayanê asîmîlasyonkaran ra tewr zaf mutesîr bîya Kirmanckî (Zazakî) ya. Heta nika bi desan reyan sebebê peydemendişê ney formê kurdkî ser o nuşteyî nusîyayê, programanê televîzyonan de fikrî ameyê eşkerakerdişî. Fikro hempar no yo ke hetê nufûse ra taybîyayîşê na grûba kurdan û erey nusîyayîşê ci sebebê muhîmî bê zî sebebo bingehên polîtîkaya dewleta tirkan a ferzkerdişê tirkî yo. Polîtîkaya ferzkerdişê yew-ziwanî ya. Kurdê zazayî na yewe ra sey sebebo bingehên yê avernêşîyayîşê ziwanê xo dewleta tirkan bivînê se ra se heqdar ê.
Ma nika bîyerê kemasîyanê xo ser. Raşt o, dewleta Tirkîya semedo ke ziwanê kurdkî, bi heme formanê xo wa, raşte ra wedarîyo û heme kurdî bi tirkî qisey bikerê çi destê ci ra ame texsîr nêkerd û ewro zî texsîr nêkena. Labelê ma kurdî hemverê ney de se kenê? Ma çende wayîr ro formanê ziwanê xo vecênê? Zazayêk çende rîyê tesîrê wêrankar yê asîmîlasyonî ra zazakî û kurmanckî xo rê keno derd? Yan zî kurmancêk çende xo rê kurmanckî û zazakî keno derd?
Seke ma heme zanê ke dewrê ma dewrê organîzebîyayîşî yo. Komelê ke organîze nêbenê hetê nasname, kultur û ziwanî ra benê vinî, mîyanê nasname, kultur û ziwanê ke organîze bîyê, mîyanê înan de vilêşênê. Organîzasyon termêko komelkî yo, şexsî nêyo. Na yewe ra ney dewrê organîzasyonan de xebat û karê şexsîyî hemverê asîmîlasyonê sîstematîkî de nêeşkenê xo ver bidê, hetê tesîrî ra xeylî bisînor manenê. Kurdî ganî meselaya ziwanî ser o sey organîzasyonan vinderê, xusûsen kurdê vakûrî. Çunke asîmîlasyono tewr sîstematîk kurdanê vakûrî ser o ame bicaardişî û hema zî dewam keno.
Eke ma ewro qalê sîyasetê kurdî kenê, eke kurdbîyayîş biraştî ma rê muhîm o, ganî cayê ziwanî ney sîyasetî mîyan de sey pêşnîyazanê konferansanê ziwanan yan zî kampanyayanê serrewextan nêbo; sey polîtîkayêka stratejîke ke bieşko hemverê asîmîlasyonî de ziwanê kurdî bipawo cayê xo bigîro. Heta organîzasyonê ke xo sey organîzasyonanê kurdan name kenê û wayîrê hêzêkê pîlî yê na meselaya ziwanî ser o bi hawayêko stratejîk nêvinderê formê kurdkî yê ke vakûr de yê, xusûsen zazakî, nizd ra asîmîleyê tirkî benê û benê vinî.
Vinîbîyayîşê her formêk kurdkî ca verdê, vinîbîyayîşê her çekuyêka kurdkî yeno manaya biserkewtişê polîtîkaya asîmîlasyonkare. Ma tu formêk kurdkî nêeşkenê teslîmê destanê sîstemê asîmîlasyonkarî bikerê. Eke organîzekerdoxê ma, sîyasetkarê ma bi ziwanê şarê xo qisey bikerê, bêguman, şarê ma zî ko wayîr ro ziwanê xo vecîyo û qisey bikero. Eke organîzekerdox û sîyasetkarê ma xebatanê xo de, programanê televîzyon û radyoyan de herinda formêk kurdkî de bi ziwanêkê bînî qisey bikerê, şarê ma zî ko hîna leze asîmîle bibo û ziwanê ma rewtir bibo vinî.