Qezaya Halîlîye ya Riha de Stadyumê 11 Nîsanî ameybî rijnayîş û herinda ci de xebatê viraştişî yê Merkezê Dayîş û Girewtişî yê Novada (AVM) ameybî destpêkerdiş. Nika xebatî ameyî merhaleyê qedîyayîşî, labelê înşatê AVMyî yo ke 3 reyan ame bedilnayîş û viraştiş de kaçaxî ameyî tespîtkerdiş.Babete ser o Temsîlkarê Odeya Plankerdişî Bajarî Mehmet Selîm Acarî qisey kerd.
Acarî va ‘ganî goreyê projeyî 4î ra 3 parçeyê cayî keskgeh bibîyêne’ û wina domna: “Cok ra proje goreyê raştîya xo nêameyo viraştiş û çarçeweya projeyî de awanîyê kaçaxî ameyî viraştiş. Proje netîceyê îtîrazan de zaf reyan ame bedilnayîş. Verê waştî ke otel, park û sewbîna projeyan bivirazî la badê ke reaksîyonî ameyî nîşandayîş, projeyî bedilnayî. Ma nê projeyî kirişt mehkeme û ma mehkeme zî qezenc kerd. Dima ra înan proje bedilna. Ma waşt wa projeyêko şar ti ra feyde bivîno bibo. Labelê projeyêko ma waşt no nêbî.”
Proje ame bedilnayîş
Acarî dewamê qiseykerdişê xo de va ‘ma seba ke keskgehî bêrî viraştiş, têkoşîn danî’ û wina qedêna: “Labelê projeyo ke ma pêşnîyaz kerdbî, hetê şaredarîye ra ameyî bedilnayîş. Goreyê projeyî awanîyê kaçaxî ameyî viraştiş. Mesela Mîgroso ke ameyo viraştiş, teberê planî de ameyo viraştiş. No yeno zanayîş, la seba nêyî senî destûr yeno dayîş. Seba ke proje tam merkezê bajarî de yeno viraştiş, do trafîkî ser de tesîrêko nêbaş virazîyo. Reyna Planê Masterî yê Resnayîşî yê bajarî çin o û ganî bêro amadekerdiş.”
ARJÎN DÎLEK ONCEL / DÎHABER / RIHA