Hukimatê AKP semedo ke weçînayîşê 7’ê Hezîran’î de derbeyekê giran werd, dest bi konseptekî şerî kerd û çarçoweyê no konseptî de xeylê sivîlî ke mîyanê ci de zafaneyê înan cenî û doman î amey qetilkerdiş û qeza û şaristanê Kurdistanî bi tanq û topan amey xirabekerdiş.Tewr peynî de Sîlopî de 3 cenîyê sîyasetmedar ê Kurd, bi awayo hov amey qetilkerdiş.
Vizêr Hîtler ewro Erdogan
Kurdê ke Awrûpa de cuyenî zaf cayanê Awrûpa de vejyayî raşteyan-meydanan û bi çalakîyanê xo hem qirkerdişê Parîs’î lanet kerdî û hem zî dustê faşîzmê AKP edalet waştî.
BRUKSEL: Kurdê ke Paytexta Belçîka Bruksel de cuyenî, vernîya Konsolosxaneya Fransaye de kom bî û semedê ke qirkerdişê Parîsî şermizar bikî çalakî viraştî. Çalakgerî ke raybereya Têgêrayîşê Cenîyê Kurdî û Yewitîya Cenîyê Sosyalîstî de amey têhet, tîya ra ver bi konsolosxaneya Tirkîyaye meşîyay. Çalakîye de drûşmê sey ‘Vizêr Parîs, eyro Kurdistan’, ‘Vizêr Hîtler eyro Erdogan’ amey qîrayîş û rayna ame vatiş ke semedo ke hukimeta AKP qetilkerdişê Parîsî nê hîrê serrî yî roşn nêkerdo, qetlîyamê Silopîye virazya û rayvistişê cenîyan semedê girdkerdişê çalakîyan vengdayîş kerd.
“Edalet wazeme”
BERLÎN: Kurdê ke paytextê Elmanya Berlînî de cuyenî raybereya Meclîsê Cenîyan ê Destan û NAV-DEMe, vernîya Konsolosxaneya Fransa de amey têhet û semedê edaletî çalakîya nobedî viraştî. Çalakîye de amey vatiş ke seba ke edalet erey mendo, dewleta Tirkîye zî nêyî ra efteriyayîş girewto. Çalakîye de posterê Sakîne Cansiz, Fîdan Dogan, Leyla Şaylemez û Sêvê Demîr, Fatma Uyar û Pakîze Nayir ameyî akerdiş û drûşma ‘Ma edaletî wazenî’ amey berzkerdiş. Çalakîye de semedê çalakîyî bêrî girdkerdiş vengdayîş ame kerdiş.
HANNOVER: Kurdî bi raybereya Meclîsê Cenîyan a Ronahî, Hannoverî de amey têhet û vernîya HBFe de çadire akerd û tîya de terorê AKP ke Kurdistanî de dana meşnayîş, şermizar kerdî. Çalakîye de drûşmê sey ‘Terorîst Erdogan’, ‘Qatilê domanan Erdogan’ amey qîrayîş. Komîteya Hedrekar semedê çalakî veng da û vat ke ganî her kes beşdarê çalakîyan bibo.
Fînansker Awrûpa, kiştox Tirkiye
DARMSTADT: Endamê Ciwanê Azad vernîya HBFa Darmstadtî de çalakîya ronîştişî viraştî. Çalakîye de drûşmê sey ‘TC a dagîrker Kurdistanî ra şo’, ‘Vizêr Hîtler, eyro Erdogan’, ‘Fînansker Ewropa, qatil Tirkîya’ û sewbîna amey qîrayîş.
KÎEL/MULLHEÎM: Kurdê ke şaristanê Kehl û Mullheîmê Almanyaye de cuyenî, semedo ke bal biancî qetlîyamê ke hetê dewleta tirkî ra yenî kerdiş, grewa vêşanî dayî destpêkerdiş. Grewa vêşanî Navendê Kultirê Elewîyan a Kehl û Navendê Kultirê Elewîyan a Mullheîmî de, awayo bêpeynî û dore reyde yeno viraştiş. Çalakgerî veng dayî her kesî ke wa dijî qetlîyaman bêveng nêmanî. OSNABRUCK: Tîya de semedo ke balê sazî û partîyan bêro antiş, derheqê qetlîyaman de dosyayê ke ameyî hedrekerdiş, sazî û partîyan ra ame dayîş. Çalakîye ra Endamê Navenda Komelo Demokratîk a Kurd, dostê almanî û rayvistişê sivîlî beşdar bî.
MUNCHEN: Kurdî bi raybereya Meclîsê Komelê Kurd a Munhenî vernîya awanîya şaredarîya ke Marîenplatzî de ya, amey têhet û mîtîngekî viraştî. Mîtîng bi girewtişê rêzî dest pê kerd û bade rêzgirewtişî temsîlkarê NAV-DEMe qalî kerdî û vengdayîşê xoverdayîşî kerd.
‘Kiştox Erdogan’
STRASBOÛRG: Kurdê ke şaristanê Fransaye Strasboûrgî de cuyenî, raybereya TJK-E de amey têhet û hovîtîya hukimatê AKP şermezar kerdî. Çalakîye de drûşmê sey ‘Qatil Erdogan’, ‘Kurdistan do faşîzmî ra bibo goristan’ û sewbîna qîray. Çalakîye de ame vatiş ke roj roja berzkerdişê xoverdayîşî yo, roj roja bi ruhê Kobanêye dewleta tirkî ra hesabpersayîşî ya.
VIYANA: Kurdî paytextê Awûstûrya Vîyanaye de semedo bal biancî ser qirkerdişê ke hukimatê AKP dosyayek hedre kerdî û teslîmê Televîzyonê Dewlete ya Awûstûryaye kerdî. Çalakîye de posterê Rayberê Şarê Kurd Abdullah Ocalan û beyraqê PKK, KCK û PYDe akerdî û rayedarê televîzyonî reyde pêvînayîş kerdî.
ANF/BRUKSEL