Nûmayişê xêmronayenî de eleqe ancîya rewş û rolê Rayverê Şarê Kurd Abdullah Ocalan û serbestîya ci ser. Paytexta Almanya Berlîn de nûmayişê xêmî roja 10. de qedîya. Çarçoveyê nûmayiş de bi hezaran kesî derheqê rewşê Ocalan û terora dewleta tirk de amey xeberdarkerdiş. Kurdistanijan aşkere kerdî ke iyê dê nika ra tepîya zî, nûmayişanê xo bi rengê cîya cîyayî biramê.
Heta 15ê Tebax ramenê
Sûkanê bîn ê Almanya de zî, bi nûmayişan wastenê azadîya Ocalan û Kurdistanî rê statu ardîya ziwan. Nûmayişanê xêman de eleqe anciya terorê dewleta tirk ser.Nûmayişê Kurdistanijan heta 15ê Tebaxi virazîyenê. Sûkanê Swîsre Zurîh û Bern de zî çadir û standî ronîyay û Ocalanî rê azadî û Kurdistanî rê statu waziya. Bi eynî waştene sûkanê Hollanda Amsterdam, Den Haag û Arnheîm de zî Kurdistanijî meydanan de bî û xêm ronayî.
Paytexta Yewnanîstan Atîna de zî nûmayişa xêm ronayene ke hîrê rojî virazîya bi jew mîtîngî qedîya. Romanya de zî Kurdistanijan paytext Bukreş de xêm (çadir) ronay, Romen û tûrîstan xeberdar kerdî û vera terorê dewleta tirk desteg waştî. Avûstûrya de zî, sûkanê Vîyana, Înnsbruck û Lînz de xêm ronîya.
Nûmayişê Îngilîstan zî London û sûka Brîghton de virazîya. Kurdistanijê ke xêm û standa enformasyon ronayî hayr antî tecrîdê giran ya dûştê Rayverê xo Ocalanî ser û serbestîya ci ardî ziwan.
NAVENDÊ XEBERAN