Welatanê Awrûpa ra piya sazgehê zey Mahkemeya Heqê Merdiman êrişanê dewleta Tirk yê vera Cizîr temaşe kerd û bêveng mend. Bi na tewir destûrê qetilkerdişê bi desan kesan da. Kurdê ke Awrûpa de cuwyenê xo kenê hadre ke 22ê Sibat’î de MHMA, Jûbiyena Awrûpa û mekanîzmayê ke girêdayê ci yê, yê ke qetlîamê Cizîr ra bêveng mendî protesto bikerê.
Bi qehremanî xover danê
Vera êriş û hewldayenê qirkerdin yê hikûmeta AKP, KCD-E, TJK-E, CDK-F, NAV-DEM, FEDA, FKE, Cîk û Konseyê Demokratîkê Kurd yê Swîsre, Hollanda û Belçîka vengê nûmayişê protestoyî da. Damustayina piyayî de hayr anciya êrişanê dewleta Tirk yê vera Kurdistan û xoverdayişê Kurdan ser. Damustayina rêxistinanê Kurd wina dewam kerd: “Sûkê ma, welatê ma, şarê ma hetê dewleta barbar yê Tirk yeno veşnayen, rijnayen. Dûştê na qirkerden şarê ma û dostê ci bi cesaret û qerardariyekê gird xover danê, verdê dewleta tirk çokan nênanê ro, teslîm nêbenê, bi qehremanî lej kenê.
Faşîzm bedenê ceniyan teşîr keno
Damustayin de hayr anciya xoverdayişê qehremanî yê ceniyanê Kurd ser û wina vajiya: “Dewleta kolonyalîst û qirkerdox bi kiştişê ceniyê kurd ra bi sînor nêmanena, bedenê ci kena viran, kuçe û meydanan de teşîr kena. Nê êrişê vera kamiya ceniya azadî yê. Nê êrişê faşîzane ke vizêr şexs dê Ekîn Wan de rîday, ewro Cizîr de vera ceniyanê Kurd de benê. Sûr de, Sîlopî de, Nisêbîn de, Şirnex de bi seyan ceniyê sivîl, doman û camêrdî bi hovane qetil bî. Wehşetî de sînorî nêsilasiyenê. “
Awrûpa qetlîaman testîq kerd
Damustayina piyayî de vistiya vîrî ke, dewleta Tirk vera şarê Kurd herbekê topyekun dayo destpa kerdiş û vajiya ke no herb açarniya pêvacoyê qirkerdin: “Cizîr de însanî keyeyê xo de, kuçeyan de amey qetilkerdiş, bi zorî amey goçkerdiş. Serva (qandê) ke na wehşetî rê vajê ‘vindere’ mekanîzmayanê mavênneteweyî rê veng ame dayen. Taybetî demê bodrimê wehşetî de ke 155 însanî miyan de amey qetilkerdin, mekanîzmayanê Jûbiyena Awrûpa rê serpirodayiş ame kerdin. Serva ke Mahkemeya Heqê Merdiman yê Awrûpa (MHMA) kesê dirbetin ke bodrimê wehşetî de mehsûr mendî rê korîdorê însanî akero û serva ke Jûbiyena Awrûpa (JA) vera ‘qedexe’yê vejyayişê kuçe yê dewleta Tirk rê tewir damusno serpirodayişî amey kerdin û waziya ke qerarê tedbîr bîro giroten. La MHMA nê pêrokîn serpirodayişî û waştenî red kerd.”
Tirkiye Awrûpa ra qûwet gêna
Damustayin de vajiya ke, dewleta Tirk no tewrê dewleta Tirk ra qûwet girot û wehşetî de sînor nêsilasna û wina dewam kerd: Însanê ke hîrê bodriman de bî, bi hovane amey qetilkerdin, lete lete kerdî, cesedê ceniyan kuçeyan de teşîr kerdî. MHMA wayrê erjiyayenanê xo zî nêvejiya. JA qirkerdenanê Kurdistan rê bêveng mend. Rexmo ke Tirkiye azayê Konseya Awrûpa (KA) ya, KA vera binlingkerdişê heqan de bêveng mend û testîq kerd.”
Damûstayin de ame vaten ke, serva protesto kerdişê tewrê JA, MHMA û bêvengiya nê sazgehan, sazgehê Kurd yê Awrûpa dê rêze nûmayişan virazê. Damustayin de herzewbîn vajiya ke, serpirodayişê ke derheqê tecrîdê vera Rayverê Şarê Kurd Abdullah Ocalan’î de CPT rê amey kerdin zî bê netîce mendî.
22ê Sibatî de ver MHKA
Sazgeh û rêxistinanê Kurd day zonayen ke 22ê Sibat de ver bana Mahkemeya Heqê Merdiman yê Awrûpa de nûmayişê ronişten viraziyeno. Damustayin bi no vengdayişî qediya: “Fina veng danime welatanê Jûbiyena Awrûpa ke wayrê erjiyayenanê xo yê tarixî bivejyê, qirkerdin û sûcê herbî yê ke Kurdistan de qewimenê testîq nêkerê. Veng danime şarê xo, ceniyan, gencan û dostanê xo yê Awrûpa ke tewrê nûmayişa protestoyî bibê.
ANF/NAVENDÊ XEBERAN