Roj çino ke ma yew neheqî nêeşnawe. Na rey 199 dezhegê sîvîlê ke mîyan de dezgehê sey MKM, GOÇ DER, Cemîyetê Rojnamegeranê Azadan, MHD, ÇHD TUHAD FED, MEYA DER û KURDÎ DER zî estbî bi yew qerarname ameyî padayîş.
Şarê ma bi gonîya xo, areqê xo û emegê xo nê dezgehî awan kerdbî. Her dezge yew wesif dîyêne û semedê heq û huqûq mucadele kerdêne. Yeno fehmkerdiş ke no welat de semedê heqgeyrayîş êdî yew tek rayîro demokratîk nêmendo. No welat de êdî kes nêeşkeno heqê xo yê protestokerdişî û heqê xo yê xoorganîzkerdişî bixebitno. Tena nê çî AKP û MHPîyan rê serbest ê. Ê eşkenê her tewir kar û gure bikerê. La muxalîf û kurdî nêeşkenê xo tey bidî. Her roj yew neheqî yena înan ser. Televîzyonî yenê padayîş, sîyasetmedarî erzîyenê hepisxane û vengê heme muxalîfan yeno birnayîş. Yanê vanê ke ‘Yan şima benê AKPyij yan ma şima orte ra wedarnenê.’ Serekkomar Recep Tayîr Erdogan her roj qisey keno û vano ‘Yan şima milê xo kenê çewt yan şima no welat terk kenê’
Qewetê dewelete pêro bi destê AKP kurdan û muxalîfanê bînan ser o yeno xebitnayîş. Seke ma zanê Tirkîya de (hema kes nêzano kamî rê xizmet kerdî) 15ê Temmuze de teşebusê derbeya elşkerî bibi û derbekarî sernêkewtibî. Teşebusê derbe ra dima Tirkîya de her kes yew nefeso xorîn girewt û va ‘Axirî derbe nêbi. Ê ke bi weçînayîş ameyî sere ganî bi weçînayîş bêrê war’ Her kes pawitêne ke AKP û Recep Tayîp Erdogan kerdenanê xo yê antîdemokratîk ra îbret gênê û semedê averşîyayîşê demokrasî reformanan kenê. Raşta ci merdim ewnîyeno rojanê ewilan wina yew îxtîmal estbi. Serekwezîr Erdogan, Kiliçdaroglu, Baxçelî û Erdogan çend rey ameyî têhet. Mesajê nermî ameyî dayîş. Erdoganî bi raybazê terse îlankerdişê OHALî da qebulkerdiş. Kiliçdarogluyî dima ra fehm kerd ke xapîyayo. Baxçelîyî pê talebê xo yê zulmkerdişê kurdan her çîyê AKP qebûl kerd. Nika zî ma vînenê ke AKP û MHP sîstemê serekkomarî de ameyî werê. Ma dî ke Baxçelî û Erdogan bîyê sey birayê yewbînan. Na rewşe tem zî çîyo ke Erdoganî xeyal kerdêne ya. Bi OHALî çîyo ke zerrra ey ra vîyartêne keno. Teşebusê Derbe semedê ey bîyo xenîmet. Çi xirabîya ke xeyal kerdêne nika keno. Wina bîyo ke Tirkîya de çîyo ke demê derbeyan de nêamebi kerdiş nika yeno kerdiş. Ma vatêne belkî derbekarî xirabî kenê la xirabîya ke nika bena hema nêameya vînayîş. Êdî Ewropa û dinya paşta xo Tirkîya ra açernenê. Xora Erdogan zî wina wazeno. Çimê ey Rojhilatê Mîyanên de yo û bîyo serekê erebanê sûnnîyan. Xora merdimê sey ey tarîx de zî wina kerdî. Sey kadroyanê Îttîhat û Terrakî keno û peynîya peynî zî do sey înan vindî keno.
Belê, derbekarî sernêkewtî. Erdoganî sey keso qezenckerde asîyeno. Erdogan sere de mend. La merdim ge-ge wina fikrîyeno. Gelo derbeya leşkerî serbikewtêne çi çî qewimîyêne. Eke ma nimune bidê derbeya leşkerî bibîyêne nê çî bîyêne. En sere de pêroyê Tirkîya de OHAL amênê îlnakerdiş. Derbekaran dest ronênê Şaredarîyan ser. Mesela Gultan Kişanake û Firat Anli amêne tepiştiş û hemşaredarê bînî. JIYAN TV, AZADÎ TV, OZGUR GUN TV, ZAROK TV, VAN TV, ÎMC TV û HAYAT TV amênê padayîş. Radyoyê muxalîfî amênê padayîş.
Rojnameyê Ozgur Gundem, Azadîya Welat û xeylê rojnameyê bînî amênê padayîş. Akademîsyenê demokratî wezîfe ra amênê eştiş. Rojnamegerî seba karanê xo emênê tewqîfkerdiş. Mamosteyê kurdan û mamosteyê muxalîfî wezîfe ra amênê eştiş, Doktorê kurdanû muxalîfê bînî wezîfe ra amênê eştiş. Dezgeyê sîvîlî amênê padayîş.
Selahattîn Demîrtaş, Fîgen Yuksekdage û parlementerê bînî yê HDP erzîyênê hepisxaneyan. Tirkîya mudaxeleyê Sûrîye û Iraqî kerdêne. Meclis amênê pasîfîzekerdiş. Çîyê bînî zî estê ke nênê mi vîr nika. Mi cor de çend çîyî rêz kerdî û mi va eke derbekarî derbe bikerdêne ewil nê çî kerdênê. Derbekarî sernêkewtî û Recep Tayîp Erdogan sere de mend. La ma pîya dî ke o zî eynî sey derbekaran welat îdare kerd û hema zî bi no qayde îdare keno. Gelo o wext ferq çî yo?