Vano heta eyro ma diyo nêdiyo kêyêke de cenî şina kê babê xo. La ez kê dadî xo da. Ez wayirê kê dukan û muaşê teqawidiya. Hîrê domanê min û dadiya yine esta. Ez teberawa kê dadîya xoda. Mirê çareserîyêke. Halê min rê derde min rê dermanêk bivînê.
Nê vatişanê cey ser vendenê keyna cê. Keyna cê zanîngeh wanena. Jîr û jîhatiya. Keynara yeno vatiş; çira babê to kê xo de niyo? Şima nê verdenê bêro kê la şima kirya dukanî zî genê û şima muaşê cê yê teqawidî zî genê. Ti se vana? Vana ser û nîm badê coy ma wo babê xo bigerime kê xo. La verê sere û nîme lazimo babê ma dir nê cuyo.
Mara ciya bicuyo. Hîkmetê serew nîme çiwo? Vat birê ma yo qic serew nîme bade coy dibistana lisa qedêneno. Babê min kêdebo tim madir dano pêro ma aciz keno. Huzur kêde nêverdeno. Ma nêşkenê wendişê xo biwanime. Ke o kêde nêbo ma xorê wanenê. Birê min zî semed zanîngeh kar bikero weş xebetyeno jîhatiyo. Bi qedênayişê lise dir go zanîngeh qezanc bikero. Qena xo rê biwano. Semed nêbo maniê wendişê birê ma. Bire ma lacê êwo.
Raşta dukan û muaşê cê ma genê. La dadî min serê sebay seet heştra heta pancê şanî paqijiya nêweşxanêke kena. Rojêk tenê îstrehetê cayo. Babê min zî zano. Şima zî şikene şêrê bivînê. Badê keyna vendenê bûrayê cê. Vanê ka ti êşkenê wayê xo ra vaje wa verdo zamê to şêro kê xo. Gunawo. Bura vano; Ezîza temê azadiye girewto. Eyro ra pey henî nêkuna binê zilmê Ezîzî. Yeno zanayiş namê yine Ezîza û Ezîzî.
Ewro na axe sero huzir nêmendo. Her roj çend merdimi jiyanê xo dest danê. Kê xo de kuçê xo de. Zerê wesaîtê xo de sûk de dewe de heme cayande merdimi yenê kiştiş. Domanan ra heta extiyaran hemi kes hedefedo. Tenê kiştiş nê. Kêyan vêşnenê. Beran şiknenê. Dukanan rijnenê. Wesaîtan pelexnenê. Merdiman gene binê çimî kenê hefsan. Zilm û teda yena kerdiş. Her roj daristanan wêşnenê. Bi vêşnayişê daristanan xweza xerepyena. Jiyanêka zerê daristanî de esta çinê bena. Dewê der dorê daristanî vêşyenê. Zîreatê dewijan vêşyeno.
Lazimo ma pêro destê xo bidime yewbînî nê ku nê zulmî kenê ma pêro şinasnenê. Ma vajim henî bes. Ma sere wedarim. Ma vengê xo berzkerim. Ma rêxistinê xo xurt kerim. Tenê ma êşkenê nê zilm û tedara xo bixelesnim. Ma zî temê ezadiye bigerim.
Nesip Gultekin