GULÎSTAN MIHEMED ANHA / GIRÊ SPÎ
18 serrî ra zêde yo ke Rayberê Şarê Kurd Abdullah Ocalanî de tecrîdêko girankerde esto. Bitaybetî nizdîyê 2 serran o ke Grawa Îmrali ra ti xebere nîna. Cok ra kurdî û dostê kurdan etirîyenî.
2 hewte verê zî derheqê Ocalanî de tayê xeberî ser medyaya komelkî de ameyî parekerdiş û nê xeberan ver no etirîyayîş hîna zêde bîyo. Cok ra kurdî 2 hewteyî ra zêdeyêr o ke payan ser de yî.
Çalakîyê ke derheqê weşî û ewleyîya Rayberê Şarê Kurd Abdullah Ocalanî de yenî viraştiş bêmabên dewam kenî. Bitaybetî nê çend hewte yo ke Rojawanê Kurdistanî ra heta Ewropa û sewbîna xeylê cayanê dinya de kurdî vejîyayî rasteyan û tecrîdo ke Ocalanî ser de yeno meşnayîş, şermizar kenî û azadîya Ocalanî wazenî.
Yê ke tecrîd şermizar kenî û azadîya Ocalanî wazenî tena kurdî nîyî. Bitaybetî Rojawanê Kurdistanî de kurd, tirk, ereb, suryanî û sewbîna şaran ra zî bi hezaran kesî beşdarê çalakîyan benî.
Babete ser o cinîyê tirkmenî yê qezaya Hemam Tirkman ya ke girêdayeyê kantonê Girê Spî ya herêma Firatî ya, qisey kerdî û vînayîşê xo ardî ziwan. Cinîyan ra Emel Hesene dîyar kerde ke ê seba şermizarkerdişê Komploya Mîyanneteweyî ya ke ser Rayberê Şarê Kurd Abdullah Ocalanî de ameye viraştiş, domanan ra heta pîlan beşdarê çalakîyan bîyî û wina dewam kerde: “Ma Erdoganî ra vanî, ti çiqas vera Rayberê ma de çîyanê nêbaşan bikerî zî, ti do nêşînbî zora îradeya şarî bîşêrî û îradeya şarî bişiknî. Do peynîya peynî îradeya şarî qezenç bikero.”
Ocalan rayberê demokrasî û azadî yo
Emel Hesene dewamê qiseykerdişê xo de wina va: "Ma tecrîdo ke Rayberê Ocalanî ser de yeno meşnayîş, şermizar kenî. Rayber Apo tena rayberê şarê kurdî nîyo; o feylesof û rayberê azadî û demokrasî yê Rojhelato Mîyanênî yo.
Cinîyan ra Fatma Mihemede zî tecrîdî şermizar kerde û wina va: "Ganî ma vera komploye de bêveng nêmanî. Azadîya Rayber Apoyî, azadîya heme cinîyanê Sûrîye ya. Seba azadîya Rayber Apoyî çi ma ra bêro waştiş, ma do bikerî."