Nisêbîn de herb û pirodayîşî roja 46. de ramenê. Hemşaredara qeza yê DBP Sara Kaya da zonayen ke badê fermanê ‘birijnê, biveşnê’ yê Erdogan’î herb hewna vêşêr xorîn û hera bi. Kaya va, ebi temaşekerdiş herb nêqedîno û veng da şaran ke bi waştişê haştî bivejyê meydanan.
Qezaya Mêrdîn Nisêbîn ke reyna 8. qedexeyê ‘vejyayişê kuçe’ îlan bi, xoverdayişê xorayirberdişî roja 46. de rameno. Çarçoveyê ablûqe de bi seyan keye, dikan û mekanê tarîxî rijiyayî, ya zî veşîyayî. Qeza de pirodayişî her ke şino benê xurt. Hemşaredara Nisêbîn Sara Kaya ke roja sifte yê pirodayişan ra na het, qeza terk nêkerd vist vîrî ke qedexe yê peynî 13ê Adar de ronîya.
Qiseyê nefret herbî kenê giran
Sara Kaya da zonayen ke 13ê Adar de erişê xêlê keye û esnafan kerdî, gule vûrnay şarî ser. Kaya vist vîrî ke nê pêrokîn sereştişî serva ke qeza bêkesî (vengkerdiş) veradê kerdî û qiseyê xo wina ramnay: “Bi qiseyanê nefret yê Erdogan û Bahçelî her her roj hewna beno giran. Vengê top û obusî jew sanîye zî nêvindenê. Heta na roj bi seyan keyeyî veşnay, rijnay. Eştî ser buroyê pawitoxan, rojnamegerî tepêşiyayî, welatijî tepêşiyayî. Personelê pakî yê şaredarîya ma ver keyeyê xo de qetil bi.”
Erjê tarixî çinî kenê
Hemşaredar Kaya vist vîrî ke mekan û sîmgeyê tarîxî ke xêlê şar û îtiqatan rê wayîrîya keyeyî kerdî amey texrîbkerdiş û aşkere kerd ke medyaya sosyal de Navendê Kultur yê Mîtanî, Manastir (Keşîşxane)ê Mor Yakûp û Camîya Zeynelabîdîn bi zanabiyen hedef amey damusnayiş. Kaya hayr ant cayanê tarixî yê qeza ser û wina va: “Navendê Kultur yê Mîtanî ke 4. Rayşiyayişê Ceniyanê Dinya ra wayîrîya keyeyî kerd û serva şarî cayekê muhîmo ke gureyînê kultur yenê ramiten o. Manastirê Mor Yakûp û Camîya Zeynelabîdîn banê tewr muhîm yê tarixê Mezopotamya yê. Nê cayê ke zey mektebê sifte yê Rojhelata Mîyanî yenê qebûlkerdiş, nika çinîbîyayiş ra rî bi rî yê. Ganî şarê dinya vernîya nayî de vinderê.”
Bêvengî merdişî ana
Sara Kaya hayr ant nûmayişê ‘Bêvengî rê nê” ke Nisêbîn, Şirnex, Gever û Qamişlo de destpa kerdî ser û ard ziwan ke ganî Tirkîye de zî no çalakî virazîyo. Kaya da zonayen ke Qamişlo û Nisêbîn jew parçeyo ke bi têlan cîya biyo û aşkere kerd ke nê hûrdî sûkî nûmûneyê tewr rind yê wa û birabiyenî yê. Kaya vist vîrî ke encex nûmayişê haştî yê şaran êşkenê herbî vindarnê.
DÎHA/MÊRDÎN