METÎN YOKSÛ / MA / SÊRT
Barajê Ilisû ver Newala Dîcle û Newala Botanî do bitemamî binê awe de bimanî. Herçiqas ke vera viraştişê barajî de xeylê reaksîyonî dîyenî zî komkerdişê awe dewam keno. Her di newalan de bi hezaran eserê tarîxî, şikefte, merge û 199 cayê ke merdimî tede cuyenî do binê awe de bimanî.
Nê cayan ra yew zî bajarê lîmanî yê Tel-Fafanî ke dewa Çattepe ya qezaya Misircî ya Sêrtî de yo. Dewa Çattepe werteyê awe de açarîyaya girave û no zî berzîya awe û texrîbatê ci nîşan dano. Nika qismêkê dewe binê awe de mendo û cayê berzî yê dewe zî aseno.
Bajarê lîmanî serranê peyênan de amebi kişfkerdene û yeno texmînkerdene ke qasê 2 hezar serran kehen o. Goreyê tayê pispor û vatişanê şarê herême, bajar 7 qatî ra pê yeno, eke cigêrayîşêko baş bêro kerdene, o wext do tarîxê ci heta 12 hezar serrî bivejîyo.
Merdimî tîya de hertim koç kenî
Goreyê Orhan Kavûtî tayê xebatê kinitişî bi hawayo baş nînî kerdene û wina dewam kerd: “Ma nêwazenî bajarêko tarîxî binê awe de bimano. Binê nê erdan de eserê senînî estî, ma nêzanî. Ma nêwaşt, labelê dewlete bi zorî girewt. Dewlete bi îstîmlaqkerdişî erdanê ma ma dest ra girewt. Merdimî tîya de hertim koç kenî. Merdimê ke serranê 90î de şîddet ver remaybî serranê 2000î de agêraybî. Labelê nika zî awe ver şonî. Tîya de tena merdimîye nê tarîxêk zî vînî bi.”