Azadiya Ocalan azadiya mirovatiyê ye
Nûnerê PYD’ê yê li herêma Kelar, Mistefa Kobanî li vir axivî û got; “Komploya 9’ê Cotmehê ne tenê li dijî Reber Apo bû, li dijî tevahî gelê Kurd bû. Destkeftiyên ku niha li Rojavayê Kurdistanê bi dest ketine jî, encamê fikir û felsefeya Rêber Ocalan in.”
Piştre jî endamê Encumena Tevgera Azadî li herêma Germiyan, Cotyar Hesen komplo şermezar kir, peyama Tevgera Azadî xwend û got; “Îro em dibînin bi fikir û felsefeya Rêber Apo hêzeke dijminî tevahî mirovahiyê weke DAIŞ’ê ber bi tinebûnê ve diçe. Ew îrade û fikrê Rêber Apo bipêşxistiye, hemû planên hêzên komploger careke din pûç kirin. Di serî de li Kobanê û parçeyên din ên Kurdistanê ev planên dijminan bi bin ketin.”
Di dawiya peyamê de jî hat gotin; “Em bang dikin ku helwêst û xebatên ji bo azadiya Rêber Ocalan berfirehtir bibin. Ji ber ku azadiya Birêz Ocalan azadiya civak û jinê ye. Azadiya mirovatiyê ye.”
Mînaka herî berbiçav Rojava ye
Li bajarokê Sengeser ê ser bi herêma Raperîn a Silêmaniyê jî bi tevlîbûna Tevgera Azadiya Civaka Kurdistanê, PYD, Komeleya Ciwanên Welatparêzên Kurdistanê, RJAK, Çalakvanên siyasî û medenî yên Rojhilatê Kurdistanê pêr komploya 9’ê Cotmehê bi meşekê hat şermezarkirin.
Meş bi dirûşmeya ‘Erdogan baş bizane, Apo xeta me ya sor e’ li Sengeserê destpê kir û heya gundê Pirdeşal ê Binarê Qendîlê dewam kir. Li vir Seîd Calid peyama Tevgera Azadî xwend, û got; “Îro 18 sal di ser komploya navneteweyî re derbas dibin. Ev komplo ji derveyî hemû yasa û exlaqê mirovahiyê hat kirin. Ev jî yek ji kiryarên durûyane yên dewletên dagirker bû.“
Di dawiya peyamê de jî hat gotin; “Êdî gelê Kurd roj bi roj destkeftiyên mezintir bidest dixe. Îro gelê me bi saya fikrên Rêber Apo li hemû cihekî xwerêveberiya xwe û konfederalîzma demokratîk, bi hev re jiyana gelan ava kiriye. Yek ji mînaka vê ya herî berbiçav niha li Rojavayê Kurdistanê dijî.”
NAVENDA NÛÇEYAN