MIHEMED HESEN / ROJNEWS / RANYA
Bi ameyîşê payîzî, êdî wextê arêdayîş û çînayîşê hinar, engure, hejîre û xeylê çîyanê bînan o. Başûrê Kurdîstanî de zî êdî wextê tutinî yo; kesê ke nê karî reyde mijul benî Şewra û Şengal de dest bi arêdayîşê tutinî kerdî.
Kesê ke Şawre de cuyenî û tutinî reyde eleqeder benî, destpêkê aşma Gulane de hêgayanê xo ramenî û dima ra mişareyanê xo virazenî. Ramitişê tutinî ra 2 hewteyî dima dest bi awdayîşî yeno kerdene û payîzî dest bi arêdayîşê tutinî beno. Kesê ke tutin arê danî ra qismêkê tutin arê danî, qismo bîn zî seba ke ziwa bikerî, mijul benî. Kesê bi nameyê Narînç Mihemede dîyar kerd ke emser goreyê serranê bînan tutin tayêr o û ganî hukmat bi vayêka başe tutin biherîno.
Kesê ke nê karî Şengal de kenî, dayî zanayene ke ferman ra ver tutin pêroyîya Îraqî de ameyêne rotene, labelê ê nika nêşênî tutin bierşawî teber. Kesê bi nameyê Îdo Şemoyî va ‘kesê ke tutinî reyde mijul benî, pereyê înan helal o’ û wina domna: “Ma karê xo ra memnun î. Verê cû tutin heme cayê Îraqî de ameyêne rotene, labelê qetlîam ra dima rayîrî padaye yî û ma nêşênî bere xo Şengal ra bivejî.”